Author: LFN

වෙඩි තබා මනුෂ්‍ය ඝාතනයක් කිරීමට සම්බන්ධ වූ සැකකරුවන් දෙදෙනෙකුව කොළඹ මධ්‍යම කෙට්ඨාස අපරාධ විමර්ශන කාර්යාංශය විසින් ඊයේ (06) පස්වරුවේ අත්අඩංගුවට ගෙන ඇත. මෙලෙස අත්අඩංගුවට ගෙන ඇත්තේ අවුරුදු 20ක් සහ අවුරුදු 30ක් වයසැති මරදාන ප්‍රදේශයේ පදිංචිකරුවන් දෙදෙනෙකි. පසුගිය 30 වනදා කෙසෙල්වත්ත මාටිස් පටුමඟ ප්‍රදේශයේ පිහිටි වෙළෙඳසැලක් තුළදී වෙඩි තබා පුද්ගලයෙකුව ඝාතනය කර තිබුණි. වෙඩිතැබීම සඳහා පැමිණි යතුරුපැදිය ලබා දී ඇත්තේ මෙම පුද්ගලයින් දෙදෙනා බව පොලිස් පරීක්ෂණවලදී අනාවරණය වී තිබේ. ඔවුන් සතුව තිබී අදාළ යතුරුපැදිය ද පොලිස් භාරයට ගෙන කෙසෙල්වත්ත පොලිස් ස්ථානය වෙත භාර දී ඇති බව පොලිස් මාධ්‍ය අංශය පවසයි. සැකකරුවන් අද (07) අලුත්කඩේ මහෙස්ත්‍රාත් අධිකරණය වෙත ඉදිරිපත් කිරීමට නියමිත අතර…

සැකසහිත ලෙස මියගිය 22 හැවිරිදි සරසවි සිසුවියකගේ මළසිරුරක් හමුවී තිබේ. ඇය නවාතැන් ගෙන සිටි නවාතැන්පොලේ කාමරයක් තුළ තිබී ඊයේ (03) පස්වරුවේ සිරුර සොයාගෙන ඇත. අප වාර්තාකරු සඳහන් කළේ ඇය යාපනය විශ්වවිද්‍යාලයේ කළමනාකරණ පීඨයේ අධ්‍යාපනය ලද සිසුවියක් බවය. පොලීසිය පැවසුවේ ඇය නවාතැන් ගෙන ඇත්තේ යාපනය, කලඩ්ඩිප් ප්‍රදේශයේ බවත් ඇය මන්නාරම ප්‍රදේශයේ ස්ථීර පදිංචිකාරිනියක් බවත්ය. ප්‍රදේශවාසීන් පවසා ඇත්තේ ප්‍රේම සම්බන්ධතාවයක් බිඳවැටීම හේතුවෙන් එම තරුණිය සියදිවි නසාගෙන ඇති බවට ආරංචියක් පැතිර යන බවය. මියගිය සිසුවියගේ මළසිරුර පශ්චාත් මරණ පරීක්ෂණය සඳහා යාපනය රෝහල් මෘත ශරීරාගාරයට යොමුකර ඇත. සිද්ධිය සම්බන්ධයෙන් යාපනය පොලීසිය වැඩිදුර පරීක්ෂණ සිදුකරයි.

තවත් භාණ්ඩ 300ක ආනයන සීමා ලිහිල් කිරීමට සූදානම් බව රාජ්‍ය අමාත්‍ය රංජිත් සියඹලාපිටිය මහතා පවසයි. එම කටයුතු සැප්තැම්බර් පළමු සතිය වන විට සිදුවෙනු ඇති බවද වාර්තා වෙයි.

හිටපු අමාත්‍ය හා කළුතර දිස්ත්‍රික් පාර්ලිමේන්තු මන්ත්‍රී කුමාර වෙල්ගම මහතාට ඊයේ පෙරවරුවේ මතුගම නගරයේ දී කිසියම් පුද්ගලයකු පහරදී ඇතැයි පොලිසිය කියයි. මතුගම නගරයේ එළවළු වෙළෙඳහලක් තුළ සිදු වූ බහින් බස් වීමකින් පසු මන්ත්‍රීවරයාට පහරදී ඇතැයි පොලිසිය කියයි. පහරකෑමට ලක්වූ මන්ත්‍රීවරයා වෛද්‍ය ප්‍රතිකාර සඳහා රෝහල් ගත කර ඇති අතර පහරදුන් පුද්ගලයා පොලිස් අත්අඩංගුවට පත්ව ඇත.

අමාරුවේ වැටුණ රට ගොඩගන්නවා කියා ආණ්ඩුව ජල ගාස්තුව පවා වැඩි කර ඇතැයි විපක්ෂ නායක සජිත් ප්‍රේමදාස මහතා ප්‍රකාශ කළේය. රටේ ජනතාව රවටා ජල බිල සියයට 50කින් වැඩි කිරීම ජන පීඩක අත්තනෝමතික ක්‍රියාවක් බවත් විපක්ෂනායකවරයා පැවසීය. ජනතාවගේ කරපිට බර පටවා රට ගොඩ ගත හැක්කේ කෙසේදැයි ආණ්ඩුවෙන් ප්‍රශ්න කරන බවත් විපක්ෂ නායක කාර්යාලයේ දී ජාතික ඉතිරි කිරීමේ බැංකුවේ සමගි සේවක සංගමයේ අරමුදලට රුපියල් ලක්ෂයක මුදලක් ලබා දීමේ අවස්ථාවට එක් වෙමින් ඔහු පැවසීය. හෙට අනිද්දා දින ගෑස් මිලත් වැඩි වූ පසු ජනතාව කබලෙන් ලිපට වැටෙන බවත් රජයට ජනතාව ගැන කිසිදු හැගීමක් නොමැති බවත් විපක්ෂනායකවරයා එහිදී පැවසීය.

දර්ගා නගරය,නුග ගහලන්ද ප්‍රදේශයෙදී පොඩි මත්තා, යන අන්වර්ථ නාමයෙන් හඳුන්වන මත්ද්‍රව්‍ය ජාවාරම්කාරවකු (20) රුපියල් කෝටියක හෙරොයින් ග්‍රෑම් පන්සියයක් යතුරු පැදියකින් ප්‍රවාහනය කරමින් සිටියදී නුග ගහලන්ද ප්‍රදේශයේ දී ඊයේ (3) කළුතර කොට්ඨාස දූෂණ මර්දන මර්ධන ඒකකය මගින් අත්අඩංගුවට ගත් බව කියයි. අත්අඩංගුවට ගත් සැකකාර තරුණයා වැලිපැන්නෙජොසා නමින් හැඳින්වූ පොලිස් වෙඩි පහරකින් මිය ගොස් සිටි මත්ද්‍රව්‍ය ජාවාරම් කරුගේ ගෝලයන් අතරෙන් අයෙකු බවද පොලිසිය කියයි. සැකකරු රඳවා ප්‍රශ්න කිරීමට නියමිත අතර අනතුරුව වැලිපැන්න පොලිසිය මගින් මතුගම මහේස්ත්‍රාත් අධිකරණයට ඉදිරිපත් කිරීමට නියමිතය. කළුතර කොට්ඨාස භාර ජ්‍යෙෂ්ඨ පොලිස් අධිකාරී කපිල ප්‍රේමදාස, සහකාර පොලිස් අධිකාරි දුමින්ද රාජපක්ෂ යන මහත්වරුන්ගේ උපදෙස් මත කළුතර කොට්ඨාස දූෂණ මර්දන ඒකකයේ…

කඩුවෙල වැලිවිට අටේ කණුව වැව පාර ප්‍රදේශයේ අතහැර දමා ගොස් තිබියදී හමු වූ නිරැවත් පුද්ගල මල සිරැර සම්බන්ධයෙන් අත් අඩංගුවට ගත් සැකකරුවන් සිව් දෙනෙකු ඊයේ (03) සවස කඩුවෙල මහේස්ත්‍රාත් නිල නිවස වෙත ඉදිරිපත් කිරීමෙන් පසු පැය 48 කාළයක් රදවා ගෙන වැඩි දුරටත් ප්‍රශ්න කිරීමට කඩුවෙල මහේස්ත්‍රාත් චාණිමා විජේබණ්ඩාර මහත්මිය අවසර ලබා දුන්නාය. අදාල ඝාතනය සම්බන්ධයෙන් පරීක්ෂණ පවත්වන කඩුවෙල පොලිසිය විසින් කරන අධිකරණයෙන් එම ඉල්ලීම සිදු කරන ලදී. මෙලෙස මහේස්ත්‍රාත්වරිය හමුවට ඉදිරිපත් කරන ලද්දේ වැල්ලම්පිටිය මෙගොඩ කොලොන්නාව පදිංචිකරුවකු වන මුණවිර කන්කානමගේ දිනේෂ් ඉරෝෂණ තරින්ද වැල්ලම්පිටිය කිත්තම්පහුව ලන්සියාවත්ත පදිංචිකරුවකු වන කුලසේකර මුදියන්සේලාගේ සුසන්ත ප්‍රියදර්ශන කුමාර ත්‍රිරෝද රථ රියදුරෙකු වූ අංගොඩ කැළණිමුල්ල පදිංචිකරුවකු…

චීනයට මෙම මාසයේදී කාලගුණයෙන් දැඩි බලපෑම් එල්ලවනු ඇතැයි එරට කාලගුණ බලධාරීන් පුරෝකථනය කර තිබේ. ඔවුන් පවසන්නේ අගෝස්තු මාසයේදීත් චීනයට සුළි කුණාටු 03ක පමණ බලපෑම් එල්ල වනු ඇතැයි අපේක්ෂා කරන බවය. ඒ හමුවේ උතුරු හා දකුණු දිග චීනයට දැඩි ගංවතුර තත්ත්වයන් ද බලපානු ඇතැයි අපේක්ෂා කෙරේ. චිනයේ කාලගුණ බලධාරීන් මෙම අනතුරු ඇගවීම් සිදුකර ඇත්තේ මේ වනවිටත් චීනයේ ප්‍රදේශ රැසක් ගංවතුරෙන් ආපදාවට ලක්වී ඇති පසුබිමක් තුළය. ඉකුත් සතියේ බලපෑ සුළිකුණාටුව හමුවේ චීනයේ බීජිං හා හෙබෙයි පළාතට දැඩි බලපෑම් එල්ල වුණි. දේපළ රැසක් විනාශ වූ අතර මරණ ද වාර්තා විය. මෙම වසරේ ගතවූ කාලය තුළ චීනයට කාලගුණ විපර්යාස හමුවේ දැඩි බලපෑම් එල්ල වෙමින්…

ලංකා ප්‍රිමියර් ලීග් ක්‍රිකට් තරගාවලිය පැවැත්වෙන්නේ ක්‍රීඩා අමාත්‍යංශයේ අනුමැතියකින් තොරව බව ක්‍රීඩා අමාත්‍ය රොෂාන් රණසිංහ මහතා පවසයි. ඔහු මේ බව සඳහන් කළේ ජාතික ක්‍රීඩා සංගම් නිලධාරීන් සමඟ පැවති සාකච්ඡාවක් අතරතුරදීය. මෙම අවස්ථාවට ශ්‍රී ලංකා ක්‍රිකට් ආයතනයේ සභාපති සහ ලේකම්වරයා ද එක්වී තිබුණි. ලංකා ප්‍රිමියර් ලීග් ක්‍රිකට් තරගාවලියේ තරග 5ක් මේ වනවිට පවත්වා අවසන්ය.

විශ්වවිද්‍යාල තුළ විශාල වශයෙන් බුද්ධිගලනයක් සිදුවෙමින් පවතින බව විශ්වවිද්‍යාල ආචාර්ය සංගමය පවසයි. එහි සභාපති මහාචාර්ය බරණ ජයවර්ධන මහතා සඳහන් කළේ පසුගිය මාස 06 තුළ පමණක් විශ්වවිද්‍යාල ආචාර්යවරුන් 600ක් පමණ විශ්වවිද්‍යාල හැර ගොස් ඇති බවයි. ඒ හේතුවෙන් ඇතැම් පීඨ පවත්වාගෙන යෑම පිළිබඳ ගැටලු මතුවී ඇති බවද ඔහු පෙන්වා දෙයි. විශ්වවිද්‍යාල ආචාර්යවරුන් හා මහාචාර්යවරුන් පිරිසක් විශ්වවිද්‍යාල ප්‍රතිපාදන කොමිෂන් සභාවේදී අධ්‍යාපන අමාත්‍ය සුසිල් ප්‍රේම්ජයන්ත මහතා සහ විශ්වවිද්‍යාල ප්‍රතිපාදන කොමිසමේ නිලධාරීන්ව ඊයේ හමුවුණි. ඒ, බදු සංශෝධනයත් සමග විශ්වවිද්‍යාල පද්ධතිය තුළ මතුවී ඇති ගැටලු පිළිබඳව සාකච්ඡා කිරීම සඳහාය. කෙසේවෙතත් විශ්වවිද්‍යාල ආචාර්යවරුන් හා මහාචාර්යවරුන් පවසන්නේ සිය ගැටලුවලට විසඳුම් නොලැබෙන්නේ නම් ඉදිරියේදී දැඩි තීරණ ගන්නා බවය.