කියුබාවේ පැවති ‘ජී 77 සහ චීනය’ රාජ්‍ය නායක සමුළුවට සහභාගී වූ ජනාධිපති රනිල් වික්‍රමසිංහ මහතා අමෙරිකාවේ නිව්යෝර්ක් නුවරට ළඟා වී තිබේ.
ඇමරිකාවේ පැවැත්වෙන එක්සත් ජාතීන්ගේ මහ මණ්ඩලයේ 78 වැනි සැසිවාරයට සහභාගී වීම සඳහා ජනාධිපතිවරයා නිව්යෝර්ක් නුවරට ළඟා වූ බව ජනාධිපති මාධ්‍ය අංශය සඳහන් කළේය.
ජනාධිපති රනිල් වික්‍රමසිංහ මහතා ‘ජී 77 සහ චීනය’ රාජ්‍ය නායක සමුළුව පෙරේදා (15) දිනයේ ඇමතූ අතර, එහි දී ඔහු ප්‍රකාශ කළේ, ගෝලීය සංවර්ධන අභියෝගයන්ට මුහුණ දීමේ දී විද්‍යාව, තාක්ෂණය සහ නවෝත්පාදන අංශයට තීරණාත්මක කාර්යභාරයක් ඉටුකළ හැකි බවයි.
සිය කියුබානු සංචාරය තුළ දී ජනාධිපතිවරයා සහ කියුබානු ජනාධිපති මිගෙල් ඩියෙස් කැනෙල් බර්මියුඩෙස් මහතා අතර විශේෂ සාකච්ඡාවක් ද පවත්වනු ලැබීය.
එක්සත් ජාතීන්ගේ මහ මණ්ඩලයේ 78 වැනි සැසිවාරය හෙට දිනයේ සිට ලබන 21 වැනි දින දක්වා පැවැත්වීමට නියමිත අතර, ජනාධිපති රනිල් වික්‍රමසිංහ මහතා සැප්තැම්බර් 21 වැනි දින සැසිවාරය අමතා සිය විශේෂ දේශනය සිදු කිරීමට නියමිත බව ජනාධිපති මාධ්‍ය අංශය සඳහන් කරයි.
එම සැසිවාරයට සමගාමී ව සැප්තැම්බර් මස 18 වැනි දින පැවැත්වෙන 2030 වෙනුවෙන් පරිවර්තනීය සහ වේගවත් ක්‍රියාදාමයන් සඳහා ලෝක නායකයන් විසින් මාර්ගෝපදේශය සපයනු ලබන 2023 තිරසර සංවර්ධන ඉලක්ක සමුළුයේ රාජ්‍ය නායක සමුළුව සඳහා ද ජනාධිපතිවරයා සහභාගී වීමට නියමිතය.
එදින ජනාධිපති රනිල් වික්‍රමසිංහ මහතා සමුළුවට එක් ව සිටින රාජ්‍ය නායකයන් කිහිප දෙනෙකු සමඟ ද්වීපාර්ශ්වික සාකච්ඡා පැවැත්වීමට නියමිත අතර, සමුද්‍රීය ජාතීන් සඳහා වන ඉන්දු පැසිෆික් දූපත් රාජ්‍යයන් අතර සංවාදය සඳහා ද එක් වන බව ජනාධිපති මාධ්‍ය අංශය වැඩිදුරටත් සඳහන් කරයි.