පිරිවැය ආවරණය වනපරිදි විදුලි ගාස්තු ගැලපීම ඇතුළු පූර්ව ක්‍රියාමාර්ග සපුරාලීමත් සමඟ ජාත්‍යන්තර මූල්‍ය අරමුදලේ විධායක අධ්‍යක්ෂ මණ්ඩලය ශ්‍රී ලංකාව සඳහා වන විස්තීරණ ණය පහසුකමේ 5 වැනි වාරිකය මුදාහැරීමට තීරණය කළ බව ජාත්‍යන්තර මූල්‍ය අරමුදල පවසයි.
ඒ, අනුව ශ්‍රී ලංකාවට අමෙරිකානු ඩොලර් මිලියන 350ක මුදලක් හිමිවෙයි.
ඊයේ (03) පැවති ප්‍රවෘත්ති සාකච්ඡාවකදී ශ්‍රී ලංකා දූත මණ්ඩල ප්‍රධානී එවන් පැපාජොජියෝ මහතා මෙම කරුණු පැහැදිලි කළේය.
“ශ්‍රී ලංකාව සඳහා වන විස්තීරණ ණය පහසුකමේ සිව්වැනි සමාලෝචනය සම්පූර්ණ කිරීම නිසා ශ්‍රී ලංකාවට අමෙරිකානු ඩොලර් මිලියන 350කට ප්‍රවේශය හිමිවනවා. ඒ අනුව IMF වෙතින් ශ්‍රී ලංකාවට ලබාදුන් මුළු මුදල ඩොලර් බිලියන 1.75ක් පමණ. මෙම මුදල ශ්‍රී ලංකාවේ දැනට ක්‍රියාත්මක ආර්ථික ප්‍රතිපත්ති සහ ප්‍රතිසංස්කරණවලට සහාය වීම සඳහා යොදාගත හැකියි.”
“එය ශ්‍රී ලංකාවේ සාර්ව ආර්ථික ස්ථාවරත්වය යළි ස්ථාපිත කිරීම සඳහා වැදගත් සන්ධිස්ථානයක් වනවා. සිව්වැනි සමාලෝචනයට අදාළව ශ්‍රී ලංකාවේ කාර්ය සාධනය පොදුවේ ශක්තිමත් බව කිව යුතුයි.”
“ඉලක්කයන් සාක්ෂාත් කරගැනීමේ අවදානම අවම කරලීමටත් පියවර ගෙන තිබෙනවා. මෙම සමලෝචනයේදී ප්‍රධාන වශයෙන් පූර්ව ක්‍රියාමර්ග දෙකක් සැලකිල්ලට ගනු ලැබුවා. ශ්‍රී ලංකා බලධාරීන් ඒ ක්‍රියාමර්ග දෙකම සම්පූර්ණ කර තිබෙනවා.”
“පළමු වැන්න, 2025 වසරේ ඉදිරි කාලසීමාව සඳහා පිරිවැය ප්‍රතිසාධන විදුලි මිලකරණය. දෙවැන්න, ස්වයංක්‍රීය විදුලි මිල සැකසුම් යාන්ත්‍රණය ක්‍රියාවට නැංවීම.”