කථානායකවරු කවදාවත් සාධාරණව කටයුතු කර නොමැති බව ජාතික ජන බලවේගයේ නායක අනුර කුමාර දිසානායක මහතා පවසයි.
ඔහු අද (20) පාර්ලිමේන්තුවේදී සඳහන් කළේ යාපා, යාපා පරම්පරාවක් පාර්ලිමේන්තුවට රැගෙන ආ බවය.
කථානායක මහින්ද යාපා අබේවර්ධන මහතාට එරෙහි විශ්වාසභංග යෝජනාව පිළිබඳ විවාදයට එක්වෙමින් ඔහු මේ බව පැවසීය.
විවාදය අද පැවැත්වෙන්නේ දෙවැනි දිනටය.
පාර්ලිමේන්තු මන්ත්රී අනුර කුමාර දිසානායක මහතා,
“පාර්ලිමේන්තුව සම්බන්ධයෙනුත් ජනතාවගේ විශ්වාසය භංග වෙලා තියෙන්නේ. ඒ සියල්ල ඉවත් කිරීම සඳහා මාස 6ක් 7ක් තුළ ජාතික මැතිවරණයක් එනවා. ඒ නිසා කථානායකවරයා හෙට ඡන්දෙදී සමත් වුණත් තව මාස 6කින් අනිවාර්යයෙන් ගෙදර යන්න වෙනවා.”
“මහින්ද යාපා අබේවර්ධනට මේ මොකක්ද සිද්ධ වුණේ. මේක යාපාගේ දියවීමක් විතරක් නෙමෙයි අපේ රටේ දේශපාලනයේ දියවීමක් මෙතන තිබෙනවා.”
“කථානායකවරයා… ඔහු විටෙක ආණ්ඩුවට බයයි. තවත් විටෙක විපක්ෂයටත් බයයි. විපක්ෂනායකට පැය 2කට ආසන්න කාලයක් මේ සභාවේ කෝලම් කරන්න ඉඩ දීලා තියෙනවා.”
“මහින්ද යාපා අබේවර්ධනගේ පුද්ගලික කාර්ය මණ්ඩලයට… වසන්ත යාපා අබේවර්ධන, සරත් යාපා අබේවර්ධන, ඉඳුනිල් යාපා අබේවර්ධන, චාමර සී. යාපා අබේවර්ධන පත් කරගෙන. තමන්ගේ පවුල ගෙනාවා පාර්ලිමේන්තුවට. ඔහුගේ එක පුතෙක් ලොතරැයි මණ්ඩලයේ සභාපතිවරයා බවට පත්වෙනවා. යාපා, යාපා පරම්පරාවක් මෙතනට ගෙනාවා.”
“මම පසුගියදා වව්නියාවේ ගියා. බැනර්, කටවුට්, ඡායාරූප විශාල ප්රමාණයක් තිබෙනවා. මම ජනතාවගෙන් ඇහුවා නගර සභා ඡන්දෙ තියෙනවා ද?. ඒකට දේශබන්දු කියලා කෙනෙක් ඉල්ලනවද කියලා. පොලිස්පතිවරයා… ඔහුගේ හැසිරීම කොහොමද ?”
“කැබිනට් මණ්ඩලයත් අනීතිකව හැසිරෙනවා. එහෙම නැත්නම් කෙහෙළිය රඹුක්වැල්ල මා ඉස්සරහා ඉන්න එපැයි වාඩි වෙලා.”