විවිධ ප්‍රදේශවල ප්‍රාදේශීය සභා මන්ත්‍රිවරියන් යොදාගෙන සිදුකළ මහා පරිමාණ විදේශ රැකියා ජාවාරමක් පිළිබඳ තොරතුරු හෙළිවී තිබේ.
“ජයභූමි පදනම” නමින් මෙම ව්‍යාජ විදේශ රැකියා නියෝජිතායතනය පවත්වාගෙන ගොස් ඇත.
මෙලෙස විවිධ ප්‍රදේශවල පදිංචි තරුණ තරුණියන් රැසකගෙන් වංචනික ලෙස මුදල් අයකර ඇති බව ශ්‍රී ලංකා විදේශ සේවා නියුක්ති කාර්යාංශයේ විශේෂ විමර්ශන අංශයේ නිලධාරීන් පවසයි.
එම නිලධාරීන් පැවසුවේ අමෙරිකාවේ මියාමි නගරයේ වරාය ව්‍යාපෘතියක රැකියා රැසක් ලබාදෙන බව පවසා මෙම ව්‍යාජ විදේශ රැකියා නියෝජිතායතනය පවත්වාගෙන ගොස් ඇති බවය.
මොහාන් ද සිල්වා නම් පුද්ගලයෙකු විසින් වසර 3ට අධික කාලයක් පුරා මෙම ජාවාරම, රාජගිරිය, “ජනජය සිටි” නම් ගොඩනැගිල්ලේ 6 වන මහලේ පවත්වාගෙන ගොස් ඇති බව කාර්යාංශය පවසයි.
එම ආයතනයේ තිබී රැකියා අපේක්ෂකයින් 636 දෙනෙකුට අදාළ ලිපිගොනු කාර්යාංශ විමර්ශන භාරයට ගෙන ඇත.
සැකකරු විසින් අමෙරිකාවේ වීසා අයදුම් කිරීම සඳහා එක් අයදුම්කරුවෙකුගෙන් රුපියල් 75,000.00 බැගින් පුද්ගලයින් 400ක ගෙන් පමණ මුදල් ගෙන ඇති බව වාර්තා වෙයි.
සැකකරු අත්අඩංගුවට ගැනීම සඳහා විශේෂ මෙහෙයුම් ක්‍රියාත්මකව පවතී.
විදේශ රැකියාවක් ලබාගැනීම සඳහා යම් ආයතනයකට හෝ පුද්ගලයෙකුට මුදල් ලබාදීමට පෙර එම ආයතනයට විදේශ රැකියා සඳහා බඳවාගැනීමට කාර්යාංශයේ වලංගු බලපත්‍රයක් තිබේද යන්න හා වලංගු රැකියා නියෝජිතායතනයක් වුවද එම ආයතනයට අදාළ රැකියා ඇණවුම ලැබී ඇත්දැයි යන්න සොයා බැලීම සඳහා කාර්යාංශයේ www.slbfe.lk වෙබ් අඩවියට පිවිසීමෙන් හෝ 1989 ක්ෂණික ඇමතුම් අංකය ඇමතීමෙන් තොරතුරු ලබාගගත හැකිය.