මරණ දඬුවම නියම වී වැලිකඩ බන්ධනාගාරයේ රඳවා සිටි රැඳවියෙක් ඉන් පළාගිය පුවතක් ඊයේ (25) වාර්තාවුණි.
බන්ධනාගාර නිලධාරියෙකුගේ වෙස් ගෙන පළාගොස් තිබූ ඔහු අල්ලා ගැනීමට බන්ධනාගාර නිලධාරීන් සමත්ව තිබුණි.
වැලිකඩ බන්ධනාගාරයේ රැඳවියන් වෙනුවෙන් ආගමික වැඩසටහනක් බන්ධනාගාරය තුළ ඊයේ සංවිධාන කර ඇත.
ඒ පෙරවරු 9.30ට පමණ බව සඳහන් වේ.
මරණීය දණ්ඩනය නියමවූ රැඳවියෙකු ද ඒ සඳහා එක්ව සිට ඇති අතර ස්වල්ප වේලාවකට පසු ඔහු ඉතා සුක්ෂ්මව එම ස්ථානයෙන් ඉවතට ගොස් ඇති බව අනාවරණය වී ඇත.
එම රැඳවියා බන්ධනාගාර නිලධාරියෙකුගේ නිල ඇඳුමට සමාන ඇඳුමකින් සැරසී බන්ධනාගාරයේ ප්‍රධාන දොරටුවෙන් ම පිටතට පැමිණ ඇති බව වාර්තා වේ.
එලෙස පිටතට ආ ඔහු ත්‍රිරෝද රථයක නැගී එම ස්ථානයෙන් පිටව ගොස් තිබේ.
කෙසේ වෙතත් ප්‍රධාන දොරටුවෙන් පිටව ගිය පුද්ගලයා පිළිබඳ ඇතිවූ සැකයක් මත වහා ක්‍රියාත්මක වූ නිලධාරීන් ඔහු ලුහුබැඳ ඇත.
ඔහු ගොස් ඇත්තේ මරදාන දුම්රිය ස්ථානය දෙසටය.
ඒ අනුව රැඳවියා හඹාගිය නිලධාරීන් මරදාන දුම්රිය ස්ථානයේදී ඔහු අල්ලාගෙන ඇති අතර ඔහු ඒ වන විට දුම්රියකට ගොඩ වී සිට ඇති බව පැවසේ.
පළාගිය රැඳවියා මිනිස් ඝාතනයකට අදාළව 2015 මාර්තු 6 වනදා ගම්පහ මහාධිකරණයේදී මරණීය දඬුවම නියම සිටි 42 හැවිරිදි අයෙකි.
පළාගිය රැඳවියා අධිආරක්ෂිත බූස්ස බන්ධනාගාරය වෙත මාරු කිරීමට පියවර ගන්නා බව බන්ධනාගාර මාධ්‍ය ප්‍රකාශක චන්දන ඒකනායක මහතා ප්‍රකාශ කළේය.
එමෙන්ම සිද්ධිය සම්බන්ධයෙන් විමර්ශනයක් ආරම්භ කර ඇති බව ඒකනායක මහතා සඳහන් කළේය.