රෝහල්ගතව ප්රතිකාර ලබමින් සිටි වයස අවුරුදු දෙකහමාරක දරුවෙකු පසුගිය 25 වනදා හදිසියේ මියගොස් තිබුණි.
ඒ, පේරාදෙණිය සිරිමාවෝ බණ්ඩාරනායක විශේෂිත ශික්ෂණ ළමා රෝහලේ දැඩි සත්කාර ඒකකයේ ප්රතිකාර ලබමින් සිටි අරූෂ අශ්විද වෙල්ගම නමැති දරුවෙකි.
දිගන රජවැල්ල ප්රදේශයේ පදිංචි මෙම දරුවා පසුගිය 22 වනදා රෝහලට ඇතුළත් කර තිබුණේ පාදයේ අස්ථියක සැත්කමක් සිදුකිරීම සඳහාය.
කෙසේවෙතත් පැය 06ක සැත්කමකින් පසු දරුවා දැඩි සත්කාර ඒකකයට යොමුකළ බවත් ඉකුත් 25 වනිදා දරුවා මියගිය බවත් දරුවාගේ මව්පියන් පවසයි.
මිට පෙර අවස්ථා දෙකකදීත් පේරාදෙණිය ශික්ෂණ රෝහලේදී නිර්වින්දන ඖෂධයක් ලබාදීමෙන් පසුව ඇතිවූ සංකූලතා හේතුවෙන් කාන්තාවන් දෙදෙනෙකු මිය ගිය බවට චෝදනා එල්ල වුණි.
එවන් පසුබිමක, ජාතික ඖෂධ නියාමන අධිකාරිය ඊයේ මාධ්ය හමුවක් පවත්වමින් සඳහන් කළේ, සිය අධිකාරියේ ලියාපදිංචියකින් තොරව විශේෂ විධිවිධාන යටතේ මෙරටට ගෙන්වූ ප්රශ්නගත නිර්වින්දන ඖෂධය භාවිතයෙන් ඉවත් කිරීමට පියවර ගත් බවය.
එවන් පසුබිමක සෞඛ්ය වෘත්තිය සමිති අදත් චෝදනා කළේ දරුවාගේ මරණයටද අදාළ නිර්වින්දන ඖෂධය හේතුවී ඇති බවට සැකයක් පවතින බවය.
කෙසේ වෙතත් මේ සම්බන්ධයෙන් අප කළ විමසීමකදී පේරාදෙණිය සිරිමාවෝ බණ්ඩාරනායක විශේෂිත ශික්ෂණ ළමා රෝහලේ ප්රකාශකයෙකු සඳහන් කළේ මේ මරණය සැක සහිත බවට කිසිදු පාර්ශ්වයකින් පැමිණිල්ලක් ලැබී නොමැති බවය.
සැත්කම සිදුකර දින දෙකකට පසු මෙම දරුවා මරණයට පත්වීම නිර්වින්දන ඖෂධයෙන් සිදුවූවක් බවට සැක කිරීමට තරම් සාධාරණ හේතු නොමැති බවද ඔහු සඳහන් කරයි.