පසුගිය ජනාධිපතිවරණ සමයේ ආන්දෝලනයට තුඩුදුන් සුදුවෑන් නඩුවේ පළමුවන සාක්ෂිකරු සාක්ෂිදීම සඳහා අද (08) අධිකරණය හමුවේ පෙනී නොසිටීම හේතුවෙන් ඔහු අත්අඩංගුවට ගෙන ඉදිරිපත් කරන ලෙස කොළඹ මහාධිකරණය වරෙන්තු නිකුත් කළේය.
මෙම නඩුව කොළඹ මහාධිකරණ විනිසුරු දමිත් තොටවත්ත මහතා ඉදිරියේ කැඳවූ අවස්ථාවේ දී නඩුවේ පළමුවන සාක්ෂිකරු වශයෙන් නම්කර සිටින සරත් කුමාර නමැත්තා සාක්ෂිදීම සඳහා අධිකරණයේ පෙනී නොසිටි බව වාර්තා වෙයි.
ඔහු වෙනුවෙන් පෙනීසිටි නීතිඥවරයෙකු අධිකරණය හමුවේ ප්‍රකාශකළේ තම සේවාදායකයාට ආරක්ෂාව සම්බන්ධයෙන් ගැටලුවක් පවතින බැවින් අධිකරණය හමුවට පැමිණිය නොහැකිවූ බවය.
මෙහිදී විනිසුරුවරයා ප්‍රශ්නයක් යොමුකරමින් සාක්ෂිකරු අධිකරණය හමුවට පැමිණි සඳහා අපේක්ෂා කරන්නේ කුමන ආකාරයේ ආරක්ෂාවක් දැයි විමසීය.
ඊට අදාළ නීතිඥවරයා පැහැදිලි පිළිතුරක් ලබා දී නොමැත.
ඉදිරිපත් වූ කරුණු සම්බන්ධයෙන් සෑහීමකට පත්විය නොහැකි බව සඳහන් කළ විනිසුරුවරයා අනතුරුව අදාළ සාක්ෂිකරු අත්අඩංගුවට ගෙන අධිකරණයට ඉදිරිපත් කරන්නැයි දන්වා වරෙන්තුවක් නිකුත් කළේය.
මෙහි දී රජයේ නීතිඥවරයා ඇමතු විනිසුරුවරයා, මෙම නඩුව දිගින් දිගටම කැඳවීමෙන් ඵලක් නොවන බව පෙනීයන්නේ යැයි කියා සිටියේය.
එම නිසා පළමුවන සාක්ෂිකරු නොමැතිව මෙම නඩුව පවත්වාගෙන යාමට ඇති හැකියාව සොයාබලන ලෙසත් මෙහිදී විනිසුරුවරයා රජයේ නීතිඥවරයාට දැනුම් දුන්නේය.
ඉන් පසුව නඩු විභාගය සැප්තැම්බර් මස 01 වනදා තෙක් කල්තැබීය.
පසුගිය ජනාධිපතිවරණය සමයේ නොවැම්බර 10 වනදා මාධ්‍ය හමුවක් පවත්වමින් සුදු වෑන් වලින් පුද්ගලයින් පැහැරගෙන යාම ඇතුළු චෝදනා කරමින් එවක ජනාධිපති අපේක්ෂක ගෝඨාභය රාජපක්ෂ මහතාට අගතියක් සිදුකළේ යැයි චෝදනා කොට හිටපු අමාත්‍ය රාජිත සේනාරත්න සහ රාජ්‍ය ඖෂධ නීතිගත සංස්ථාවේ හිටපු සභාපති මොහොමඩ් රූමි යන විත්තිකරුවන්ට එරෙහිව මෙම නඩුව ගොනුකර තිබේ.