කිළිනොච්චිය කොකාවිල්හි ස්ථාපිත 4 වන (ස්වෙච්ඡා) යුද්ධ හමුදා කාන්තා බළඇණියේ රාජකාරි නියුතු සෙබළියන්ගේ ලගම ඥාතීන් පිරිසක් රාජකාරි ස්ථාන මාරුවක් අදාල කර ගනිමින් පසුගිය 15 දින එම කඳවුර ඉදිරිපිට විරෝධතාවක නිරත වූ බවට මාධ්‍ය ඔස්සේ පළකර ඇති පුවත නිවැරදි නොවන බවට ශ්‍රීලංකා යුද්ධ හමුදාව විසින් නිවේදනයක් නිකුත්කර ඇත.
එම නිවේදනය පහතින් දැක්වේ.
කිළිනොච්චිය කොකාවිල්හි ස්ථාපිත 4 වන (ස්වෙච්ඡා) යුද්ධ හමුදා කාන්තා බළඇණියේ රාජකාරි නියුතු සෙබළියන්ගේ ලගම ඥාතීන් පිරිසක් රාජකාරි ස්ථාන මාරුවක් අදාල කර ගනිමින් පසුගිය 2023 මැයි මස 15 දින එම කඳවුර ඉදිරිපිට විරෝධතාවක නිරත වූ බවට මාධ්‍ය ඔස්සේ පළකර ඇති පුවත නිවැරදි නොවන අතර මෙම උද්ඝෝෂණය අනවබෝධය හා සාවද්‍ය කරුණු මත සිදුකළ එකක් බව පළමුව සඳහන් කරනු ලැබේ.
ශ්‍රී ලංකා යුද්ධ හමුදාව කාළින අවශ්‍යතාවය මත මේ වන විට ප්‍රතිව්‍යුහගත කිරීම සිදු කෙරෙමින් පවතින අතර ජාතිය ගොඩනැගීම හා කෘෂිකාර්මික කටයුතු සඳහා ඉඳුරාම බදවා ගන්නා ලද සහෝදර දමිළ සෙබළියන් හට ස්ථාන මාරුවීම් ලබා දීමට යුද්ධ හමුදාවේ සුදානමක් ඇති බවට ලද තොරතුරක් මුල් කර ගනිමින් ඔවුන්ගේ ළඟම ඥාතීන් 2023 මැයි මස 15 දින සවස 6.30 ට පමණ 4 වන ශ්‍රී ලංකා කාන්තා බළකා කඳවුර අසලට පැමිණ විනාඩි 30 කට ආසන්න කාලයක් රැඳෙමින් ඔවුන්ගේ ඥාති සෙබළියන් එම ප්‍රදේශයෙන් ස්ථානමාරු නොකරන ලෙස ඉල්ලා සිටිනු ලැබ තිබේ.
කෙසේ වුවද, ශ්‍රී ලංකා යුද්ධ හමුදාව ප්‍රතිව්‍යුහගත කිරීම හේතුවෙන් 4 වන (ස්වෙච්ඡා) යුද්ධ හමුදා කාන්තා බළකාය සේවා අවශ්‍යතාවය මත මැදවච්චිය ප්‍රදේශයේ ස්ථානගත කළත්, ප්‍රදේශියව ඉඳුරාම බදවා ගන්නා ලද එම හමුදාගත සෙබළියන් ඔවුන් මෙතෙක් රාජකාරි කටයුතු සිදු කරනු ලැබූ සේවා ප්‍රදේශ තුලින් ස්ථාන මාරු කිරිම සඳහා කිසිදු සැලැස්මක් නොමැති බව හා ඔවුන්ගේ නිවාස ආසන්නයේ පිහිටි කඳවුරු වෙත එම ස්ථානමාරු (අනුයුක්ත කිරීම) ඉදිරියේදි සිදුකෙරෙනු ඇති බව දන්වා සිටිනු ලැබේ.