අත්අඩංගුවට පත්වූ කඩුවෙල හිටපු උපනගරාධිපති චන්දික අබේරත්න සහ සමාජ මාධ්‍ය ක්‍රියාකාරී පියත් නිකේෂල මේ වනවිට පොලිස් ආරක්ෂාව යටතේ රෝහල්ගතව ප්‍රතිකාර ලබයි.
පහරදීමේ සිද්ධියක් සම්බන්ධයෙන් ඔවුන් දෙදෙනාම ඊයේ (10) තලංගම පොලීසිය විසින් අත්අඩංගුවට ගනු ලැබීය.
පොලීසිය සඳහන් කළේ, තලංගම, කොස්වත්ත සමගි මාවත ප්‍රදේශයේ දී දෙපාර්ශවයක් විසින් සිදුකළ පහරදීමක් හේතුවෙන් සමාජ මාධ්‍ය ක්‍රියාකාරියෙකු තුවාල ලබා තලංගම රෝහලට ඇතුළත් කළ බවට ලද පැමිණිල්ලක් මත විමර්ශන ආරම්භ කළ බවය.
එම පහරදීම කඩුවෙල මහ නගර සභාවේ හිටපු උපනගරාධිපති සහ තවත් පුද්ගලයින් කිහිපදෙනෙකු විසින් මෝටර් රථ 2කින් පමැණි සිදුකර ඇතැයි ද පොලීසිය සඳහන් කළේය.
එම පිරිස සමාජ මාධ්‍ය ක්‍රියාකරුට හා ඔහුගේ මෝටර් රථයට පහරදී ඇති බවට ප්‍රකාශයක් ලබාදී ඇති අතර, තුවාලකරු වැඩිදුර ප්‍රතිකාර සඳහා කොළඹ ජාතික රෝහලට මාරු කර යවා තිබේ.
අදාළ සිදුවීම සම්බන්ධයෙන් විමර්ශනය කිරීමේ දී හිටපු උපනගරාධිපතිවරයාට ද පහරදුන් පවසා පැමිණිල්ලක් සිදුකර ඇති බව පොලීසිය පවසයි.
ඒ අනුව ඔහුද මුල්ලේරියාව රෝහලට ඇතුළත්ව ප්‍රතිකාර ලබමින් සිටී.
කෙසේවෙතත් පොලීසිය සඳහන් කළේ, දෙපාර්ශවයේම පැමිණි මත පහරදීම්වලට අදාළව සැකකරුවන් දෙදෙනාම තලංගම පොලීසිය විසින් අත්අඩංගුවට ගත් බවය.
ඒ අනුව සමාජ මාධ්‍ය ක්‍රියාකරු ජාතික රෝහලේ හා හිටපු උපනගරාධිපති මුල්ලේරියාව රෝහලේ මේ වනවිට පොලිස් ආරක්ෂාව යටතේ ප්‍රතිකාර ලබමින් සිටී.
තලංගම පොලීසිය වැඩිදුර විමර්ශන සිදුකරයි.