නියමිත ක්‍රමවේදයෙන් බැහැරව සෞඛ්‍ය වෘත්තීකයින් විදේශගත කිරිමේ ජාවාරමක් ක්‍රියාත්මක වන බව සෞඛ්‍ය වෘත්තීයවේදීන්ගේ විද්වත් සංගමයේ සභාපති රවි කුමුදේශ් මහතා පවසයි.
ඔහු සඳහන් කළේ, රජය විසින් සිදුකළ යුතු ආදාළ කටයුතු වෙනත් පාර්ශයන්ගේ මැදිහත් වීමෙන් විවිධ තැරැව්කරුවන් හරහා සිදුකරන බවට සාක්ෂි පවතින බවය.
කොළඹ දී මාධ්‍ය හමුවක් පවත්වමින් සෞඛ්‍ය වෘත්තීයවේදීන්ගේ විද්වත් සංගමයේ සභාපති රවි කුමුදේශ් මහතා මෙම අදහස් පළ කළේය.
“ලෝකයේ බොහෝ රටවල් ශ්‍රී ලංකාවට උදව් කිරීම සඳහා කලින් නොතිබුණ රැකියා අවස්ථාවන් අපේ රටට ලබාදීලා තියෙනවා. හැබැයි මේ රටට ලබාදෙන මේ රැකියා ටික නිවැරදිව කළමනාකරණය කරලා, නිවැරදි මිනිස්සු විදේශගත කරන්න රජයට බැරිවෙලා තියෙනවා තාම. අපිට පේන්නේ මේ රැකියා ටිකත් එක්ක ජාවාරම් කරන තත්ත්වයක් තමයි මේ රටේ තියෙන්නේ. ඒ නිසා වරින් වර විශේෂයෙන්ම සෞඛ්‍ය වෘත්තීකයින් රට යැවීම ජාවාරමක් බවට පරිවර්තනය කරගෙන තියෙන නිසා මේ රැකියා වෙළෙඳපොළ අවධානමකට ලක්වෙලා තියෙනවා. ඒ අවස්ථාව තියෙන සහ වගකීම තියෙන ආයතන ඒ කටයුත්ත නොකර ඉන්න තත්ත්වයකට පත්වෙලා තියෙනවා. ඒකට හේතුව තමා තමන්ගේ තැරැව්කරුවන් හරහා මේ රැකියා තුළින් විවිධ ආදායම්, විවිධ ඉපැයීම්, විවිධ අල්ලස් ලබාගැනීම සඳහා කටයුතු කිරීම. මේ කියන කාරණාවට අපිට සාක්ෂි තියෙනවා. ඒ නිසා අපි ජනාධිපතිට ලිපියක් ලිව්වා මේ කාරණය සම්බන්ධයෙන්.”