අමෙරිකානු සැලැස්මකට අනුව ඊශ්රායලයට එල්ල කරන ප්රහාර නැවැත්වීමට හිස්බුල්ලා සංවිධානය එකඟ වී ඇති බවත්, ඒ වෙනුවට ලෙබනනයේ අගනුවර වන බේරූට් වෙත ප්රහාර එල්ල නොකිරීමට ඊශ්රායලය එකඟ වී ඇති බවත් ලෙබනනය ප්රකාශ කරයි.
අමෙරිකාවේ පිහිටි ලෙබනන තානාපති කාර්යාලය සඳහන් කර ඇත්තේ, “ප්රහාර අන්යෝන්ය වශයෙන් නැවැත්වීම සඳහා වන අමෙරිකානු යෝජනාව හෙස්බුල් සංවිධානය විසින් පිළිගත් බවට තහවුරු කිරීම් ලැබී ඇති” බවය.
ඊශ්රායල අග්රාමාත්ය බෙන්ජමින් නෙතන්යාහු ද මෙම එකඟතාව තහවුරු කර ඇති නමුත්, “හිස්බුල්ලා සංවිධානය අපගේ නගර සහ සිවිල් වැසියන්ට ප්රහාර එල්ල කිරීම නතර නොකරන්නේ නම්” බේරූට් වෙත එල්ල කරන ප්රහාර ඉදිරියටත් ක්රියාත්මක වන බවට අනතුරු ඇඟවීය.
ලෙබනනය තුළ ඊශ්රායලය සිදුකරන මිලිටරි ක්රියාමාර්ග දැනට පවතින අමෙරිකා-ඉරාන සටන් විරාමයට තර්ජනයක් බවට ඉරානය අනතුරු ඇඟවීමෙන් පසුව, අමෙරිකානු ජනාධිපති ඩොනල්ඩ් ට්රම්ප් විසින් තමන් නෙතන්යාහු සහ හිස්බුල්ලා නියෝජිතයන් සමඟ සාකච්ඡා කළ බවත් සියලු වෙඩි තැබීම් නැවැත්වීමට ඔවුන් එකඟ වූ බවත් ප්රකාශ කිරීමෙන් අනතුරුව මෙම නිවේදන නිකුත් වී තිබේ.
කෙසේ වෙතත් ඊශ්රායල අග්රාමාත්ය නෙතන්යාහු ප්රකාශ කර ඇත්තේ , සැලසුම් කර ඇති පරිදි ඊශ්රායල ආරක්ෂක බලකාය (IDF) දකුණු ලෙබනනය තුළ සිය මෙහෙයුම් දිගටම කරගෙන යනු ඇති බවය.
මේ අතර, සටන නැවැත්වීමට දෙපාර්ශවයම එකඟ වූ බව ජනපති ට්රම්ප් ප්රකාශ කිරීමෙන් පසුව ද ඇතැම් ගැටුම් දිගටම පැවතුණ බව සඳහන්වේ.
උතුරු ඊශ්රායලයේ ගම්මාන දෙකක් අසල පිහිටි ඊශ්රායල ටැංකි සහ සොල්දාදුවන්ට ඩ්රෝන යානා සහ “කාලතුවක්කු ප්රහාර මාලාවක්” භාවිතා කරමින් ප්රහාර තුනක් එල්ල කළ බව හෙස්බුල් සංවිධානය පැවසීය.
මීට අමතරව, ලෙබනනයේ ඊශ්රායල මිලිටරි ක්රියාමාර්ග හේතුවෙන් ඉරානය අමෙරිකාව සමඟ පවත්වන වක්ර සාකච්ඡා අත්හිටුවිය හැකි බව ඉරානයේ තස්නිම් (Tasnim) පුවත් ඒජන්සිය වාර්තා කළේය.
ඉරානයේ ප්රබල ඉස්ලාමීය විප්ලවවාදී ආරක්ෂක බලකායට (IRGC) අනුබද්ධ පුවත් ඒජන්සිය වැඩිදුරටත් කියා සිටියේ, ඉරානය සහ එහි මිත්ර පාර්ශවයන් විසින් රතු මුහුදේ පිවිසුමේ ඇති “බාබ් අල්-මැන්ඩබ් සමුද්ර සන්ධිය සක්රීය කළ හැකි” බවය.
නමුත් පසුව Truth Social හි තැබූ සටහන් වල ජනපති ට්රම්ප් අවධාරණය කළේ ඉරානය සමඟ සාකච්ඡා “ඉතා වේගයකින්” සිදුවෙමින් පවතින බවත්, තමන් නෙතන්යාහු සහ හිස්බුල්ලා නියෝජිතයන් සමඟ කතා කළ බවත්ය.
අමෙරිකාව සහ ඉරානය අතර සටන් විරාමයක් අප්රේල් 8 වනදා බලාත්මක වූ නමුත් එය සටන් අවසන් කිරීමට අපොහොසත් වී ඇත.
මාස තුනක් තිස්සේ පවතින මෙම යුද්ධය හේතුවෙන් හෝමුස් සමුද්ර සන්ධිය ඵලදායී ලෙස වසා දමා ඇති අතර, එමඟින් ගෝලීය බලශක්ති පිරිවැය ඉහළ ගොස් ඇත.
ලෝකයේ තෙල් සහ ද්රවීකෘත ස්වභාවික වායු (LNG) සැපයුමෙන් පහෙන් එකක් පමණ සාමාන්යයෙන් මෙම සමුද්ර සන්ධිය හරහා ගමන් කරයි.
වොෂින්ටනය සහ ටෙහෙරානය ස්ථිර ගිවිසුමකට ආසන්න බවත් සාකච්ඡා ප්රගතියක් ලබමින් පවතින බවත් ජනපති ට්රම්ප් මෑත දිනවලදී නැවත නැවතත් ප්රකාශ කර ඇතත්, මෙතෙක් කිසිදු නිල ගිවිසුමකට එළඹ නැත.