මහනුවර ජාතික ශික්ෂණ රෝහලේ ප්රතිකාර ලබමින් සිටියදී අද (27) අලුයම බන්ධනාගාර ආරක්ෂාව මධ්යයෙන් සූක්ෂ්ම ලෙස පැනගිය හැටන් දික්ඔය ද්විත්ව ඝාතන සිද්ධියේ ප්රධාන සැකකරු, පැය කිහිපයක් ඇතුළත බගවන්තලාව පෙට්රසෝ වතුයායේ සැඟව සිටියදී යළි අත්අඩංගුවට ගැනීමට පොලිසිය සමත්විය.
සැකකරු පැනගිය වහාම ක්රියාත්මක වූ බගවන්තලාව සහ හැටන් පොලිස් කණ්ඩායම්, දැඩි මෙහෙයුමකින් අනතුරුව ඔහුව කොටුකරගත් අතර, අනතුරුව හැටන් මහෙස්ත්රාත් අධිකරණය වෙත ඉදිරිපත් කිරීමෙන් පසු ලබන ජූනි මස 03 වනදා දක්වා ඔහුව නැවත රක්ෂිත බන්ධනාගාරගත කිරීමට මහෙස්ත්රාත් පීටර් පෝල් මහතා නියෝග කළේය.
තම බිරිඳගේ බලපෑම් මත මෙම අපරාධය සිදුකළ බව පවසා ඇති සැකකරු, රෝහලෙන් පැනගොස් ඇත්තේ ඇයගෙන් පළිගැනීමේ දැඩි චේතනාවෙනි. බන්ධනාගාරයෙන් නිදහස් වූ සැණින් සිය බිරිඳව ඝාතනය කරන බවට මීට පෙර පොලිසිය හමුවේ පාපෝච්චාරණය කර තිබූ බැවින්, සැකකරු පැනගිය වහාම ඔහුගේ බිරිඳගේ ජීවිතයට එල්ලවූ බරපතළ අවදානම සැලකිල්ලට ගත් බගවන්තලාව පොලිසිය ඇයට විශේෂ පොලිස් ආරක්ෂාව ලබාදීමට කටයුතු කළේය.
සැකකරු අත්අඩංගුවට ගැනීමත් සමඟ ප්රදේශයේ පැවති දැඩි නොසන්සුන්කාරී සහ බියජනක වාතාවරණය මේ වන විට පහව ගොස් ඇත.