ශ්‍රී ලංකාව, ආසියානු කලාපයේ වැඩිහිටි ජනගහනයේ වැඩිවීමේ ශීඝ්‍රතාව ඉහළ රටක් ලෙස හඳුනාගෙන ඇති බව සෞඛ්‍ය අංශ පවසයි.
ප්‍රජා සෞඛ්‍ය විශේෂඥ වෛද්‍ය නිශානි උභයසේකර මහත්මිය සඳහන් කළේ, 2012 වසරේ දී මෙරට වැඩිහිටි ජනගහනය සියයට 12ක් වූ අතර එය 2024 වසරේ දී සියයට 18 දක්වා ඉහළ ගොස් ඇති බවය.
සෞඛ්‍ය ප්‍රවර්ධන කාර්යාංශයේ පැවති මාධ්‍ය හමුවට එක්වෙමින් මේ සම්බන්ධයෙන් අදහස් දැක්වු ප්‍රජා සෞඛ්‍ය විශේෂඥ වෛද්‍ය නිශානි උභයසේකර මහත්මිය,
“ලංකාවේ 2012 සංගනනයට අනුව, 12%ක් තමා හිටියේ අවුරුදු 60ට වැඩි ජනතාව. 2024 සංගනනයේ දී 18%ක් වෙලා තියෙනවා වැඩිහිටි ප්‍රජාව. අපි පූරෝකථනය කරලා තියෙනවා 2040 වෙද්දි මේ ජනතාවගේ 25%ක් ඒ කියන්නේ හතර දෙනෙකුගෙන් එක් අයෙක් වැඩිහිටියෙක් වෙයි කියලා. ආසියාවේ සමාන රටවල් ගත්තොත් වැඩිම වැඩිහිටි ජනගහණය වැඩිවීමේ ශීඝ්‍රතාවයක් තියෙන රටක් ලෙස හඳුනාගෙන තියෙනවා. ඒකට හේතු ගොඩක් තියෙනවා උපතේ දී ආයු අපේක්ෂාව වැඩිවීම හා නව උපත් ප්‍රමාණය අඩුවීම හේතුවෙන් මෙම තත්ත්වය ඇතිව තිබෙනවා.”
වැඩිහිටි ප්‍රජාව තුළ පවතින දුබලතා හේතුවෙන් සිදුවන ඇද වැටීම් රෝගී තත්ත්වයක් ලෙස වර්තමානය වන විට හඳුනාගෙන ඇති බව ද කොළඹ ජාතික රෝහලේ වෘද්ධ රෝග පිළිබඳ විශේෂඥ වෛද්‍ය සිතිර සෙනෙවිරත්න මහතා සඳහන් කළේය.
“අවුරුදු 65ට වඩා වැඩි අය සෑම තුන්දෙනෙක්ගෙන් එක් අයෙක් අවුරුද්දක් තුළ දී වැටීමට ලක්වෙනවා කියලා සංඛ්‍යාත්මකම සොයාගෙන තියෙනවා. අවුරුදු 80ට වඩා වැඩි අයගෙන් භාගයක් වසරක් තුළදී වැටීමට ලක්වෙනවා. ගොඩක් වෙලාවට වැටීම රෝගයක් ලෙස හඳුනාගෙන නෑ නමුත් දැන් වැටීම රෝගයක් බව අපි හඳුනාගෙන තියෙනවා. ගොඩක් වෙලාවට වැටුනට පස්සේ තුවාලයක් වෙනවා. තුවාලෙට බෙහෙත් කරාට වැටීමට හේතුව කුමක් ද යන්න පිළිබඳව අපි සොයා බලන්නේ නෑ. වයසට යද්දි වැටෙනවා නම් අපි හිතනවා මේක වයසට වෙන දෙයක් කියලා. නමුත් ඒක සාමාන්‍ය දෙයක් නෙමෙයි. වැටීම කියන දේ රෝගයක්. වැටීම නිසා අනතුරුවලට මුහුණදෙන්න පුළුවන්. වැටීම නිසා ගොඩක් මරණ සිද්ධවෙන වෙලාවලුත් තියෙනවා. වැටීම ඇති වෙන එක කාරණයක් තමා දුබලතාවය. එය පරීක්ෂා කරලා අවශ්‍ය පියවර ගැනීමෙන් සංකූලතා මඟහැර ගැනීමට පුළුවන්.”