රුපියල් බිලියනයකට වඩා වටිනාකමින් යුත් කුෂ් මත්ද්‍රව්‍ය කිලෝ 10ක් සමඟ පුද්ගලයින් දෙදෙනෙක් පොලිස් විශේෂ කාර්ය බළකා නිලධාරීන් විසින් අත්අඩංගුවට ගෙන තිබේ.
පසුගිය 6 වෙනිදා සවස් කාලයේ ගොතටුව පොලිස් වසමේ මානිගමුල්ල ප්‍රදේශයේ දී හා කඩුවෙල දක්ෂිණ අධිවේගී පිවිසුම අසලදී පොලිස් විශේෂ කාර්ය බළකා විශේෂ මෙහෙයුම් ඒකකයේ නිලධාරීන් කණ්ඩායමක් විසින් ලද තොරතුරු මත වැටලීමක් සිදුකර තිබුණි.
එහෙදී කුෂ් මත්ද්‍රව්‍ය කිලෝ 5යි ග්‍රෑම් 154ක්, ජංගම දුරකථනයක් හා ජාවාරමෙන් උපයාගත් බවට සැකකෙරෙන රුපියල් ලක්ෂයක මුදලක් සමඟ සැකකරුවෙක් අත්අඩංගුවට ගෙන තිබේ.
මේ අතර, තවත් සැකකරුවෙක් කුෂ් මත්ද්‍රව්‍ය කිලෝ 5යි ග්‍රෑම් 106ක්, කාර් රථයක් හා ජාවාරමෙන් උපයාගත් බවට සැකකෙරෙන රුපියල් 150,000ක මුදලක් සමග අත්අඩංගුවට ගෙන ගොතටුව පොලීසියට ඉදිරිපත් කර ඇත.
එලෙස අත්අඩංගුවට පත්ව ඇත්තේ අවුරුදු 35ක් හා 64ක් වන ගොතටුව හා කොළඹ 14 යන ප්‍රදේශවල පදිංචිකරුවන්ය.
මෙහි එක් සැකකරුවෙකු 2021 වර්ෂයේ දී අපරාධ පරීක්ෂණ දෙපාර්තමේන්තුව මඟින් අත්අඩංගුවට ගෙන අවුරුදු 01 යි මාස 08ක් රැඳවුම් නියෝග මත සිට, කොටුව මහෙස්ත්‍රාත් අධිකරණය මඟින් නිදෝස්කොට නිදහස් කර ඇති අයෙක් බවට අනාවරණය වී තිබේ.
මෙම පුද්ගලයා පාස්කු ප්‍රහාරයට සම්බන්ධ අයෙකුගේ ඉඩම් බලාගන්නෙකු ලෙසද සේවය කර ඇති බවට ද තොරතුරු ලැබී ඇත.
දැනට බන්ධනාගාරගතව සිටින දෙමටගොඩ චමින්ද නැමැත්තාගේ ප්‍රධාන ගොලයෙක් වන ‘චප්පා’ නැමති අයගෙන් මෙම මත්ද්‍රව්‍ය ලබාගත් බවට අණාවරණය වී තිබේ.