2018 වසරේ අලි ඇතුන් ගම් වැඳීම වැළැක්වීමට බලධාරීන් පියවර නොගැනීමට විරෝධය පළ කරමින් පොළොන්නරුව – මහියංගන මාර්ගයේ පිහිටි කළු කැළේ ප්‍රදේශයේදී උද්ඝෝෂණයක නිරතවීමේ සිද්ධියක් සම්බන්ධයෙන් ගොවීන් දෙදෙනෙකු අත්අඩංගුවට ගෙන රක්ෂිත බන්ධනාගාර ගත කිරීම තුළින් පොලීසිය මූලික මිනිස් අයිතිවාසිකම් උල්ලංඝනය කර ඇතැයි ශ්‍රේෂ්ඨාධිකරණය ඊයේ (07) තීන්දු කළේය.
ඒ අනුව අරලගංවිල පොලීසියේ එවක ස්ථානාධිපති ලෙස කටයුතු කළ එස්.එම්.එල්.ආර්. බණ්ඩාර මහතා විසින් ඔහුගේ පෞද්ගලික මුදල්වලින් පෙත්සම්කරුවන්ට රුපියල් 30000/- බැගින් වන්දි ගෙවිය යුතු බවත් නියෝග කරන ලදී.
පොළොන්නරුව ප්‍රදේශයේ පදිංචි ආර්. ඒ. ගාමිණී ජයරත්න සහ එච්.ආර්. එරන්ද යන අය විසින් ඉදිරිපත් කළ මූලික පෙත්සමක් විභාග කිරීමෙන් අනතුරුව අගවිනිසුරු මුර්දු ප්‍රනාන්දු, එස්.තුරෙයි රාජා යන විනිසුරුවරුන්ගේ එකඟත්වය ඇතිව ශ්‍රේෂ්ඨාධිකරණ විනිසුරු යසන්ත කෝදාගොඩ මහතා විසින් මෙම තීන්දුව ප්‍රකාශයට පත් කරන ලදී.
තීන්දුව තුළින් විනිසුරුවරු කියා සිටින්නේ පොලීසිය ඉල්ලා සිටි පමණින් යම් පුද්ගලයෙකු රක්ෂිත බන්ධනාගාර ගත කිරීමට මහෙස්ත්‍රාත්වරු කටයුතු නොකළ යුතු බවය.
සැකකරුවන් රිමාන්ඩ් භාරයේ තැබීම සඳහා පොලිසිය විසින් කරන ලද ඉල්ලීම් සම්බන්ධයෙන් විචක්ෂණශීලීව තීරණ ගැනීමේ අවශ්‍යතාවය පිළිබඳව මහේස්ත්‍රාත්වරුන් දැනුවත් කිරීම අනිවාර්ය අවශ්‍යතාවයක් බව මෙම තීන්දුවෙන් පෙන්වා දී තිබේ.
ඇප පනත මගින් පිළිගෙන ඇති පරිදි ඇප ලබා දීම සම්මතය බවත් ඇප ලබා දීම ප්‍රතික්ෂේප කිරීම ව්‍යතිරේකය විය යුතු බව සඳහන් කළ විනිසුරුවරයා මහෙස්ත්‍රාත්වරයෙකු ඇප ලබා දීම හෝ ප්‍රතික්ෂේප කිරීම සිදුකළ යුත්තේ පොලිසියේ ඉල්ලීම මත පමණක් නොව අපරාධ යුක්තියේ අරමුණුවලට අනුකූලව බවත් සඳහන් කර සිටියේය.
අධිකරණය මහ ජනතාවගේ මූලික අයිතිවාසිකම් ආරක්ෂා කිරීමට බැඳී සිටින බව මහෙස්ත්‍රාත්වරුන් දැඩි ලෙස දැනුවත් විය යුතු අතර, නීතියෙන් පිළිගත් සුවිශේෂී අවස්ථාවන්හිදී පමණක් එවැනි අයිතිවාසිකම් ක්‍රියාත්මක කිරීම සීමා කිරීමට අවශ්‍ය නියෝග නිකුත් කළ යුතු බවත් විනිසුරුවරයා පෙන්වා දුන්නේය.
මෙම තීන්දුවේ අඩංගු මූලධර්ම පිළිබඳව මහේස්ත්‍රාත්වරුන් දැනුවත් කිරීම සඳහා විනිසුරුවරුන් පුහුණු කිරීමේ ආයතනය අවශ්‍ය පියවර ගනු ඇතැයි මෙම අධිකරණයේ අපේක්ෂාව බවත් විනිසුරු යසන්ත කෝදාගොඩ මහතා සිය තීන්දුවේ සඳහන් කර තිබේ.
එසේම මහජන උද්ඝෝෂණ විසුරුවා හැරිය යුත්තේ මූලික අයිතිවාසිකම් උල්ලංඝනය නොවන ආකාරයට බවත් ඒ සම්බන්ධයෙන් පොලිස් නිලධාරින් දැනුවත් කිරීම අවශ්‍ය බවත් විනිසුරුවරයා සිය තීන්දුවේ ප්‍රකාශ කර සිටියේය.
ඊට අමතරව වල් අලි ගම් වැදීම වැළැක්වීමට අවශ්‍ය වැඩපිළිවෙලක් සකස් කරන ලෙස වනජීවි අධ්‍යක්ෂ ජෙනරල්වරයාටද නියෝග කළ විනිසුරු මඩුල්ල මෙම නඩු තීන්දුවේ පිටපත් අවශ්‍ය පියවර ගැනීම සඳහා නීතිපතිවරයා, පොලිස්පතිවරයා, වනජීවී අධ්‍යක්ෂ ජනරාල්වරයා, වන සංරක්ෂණ අධ්‍යක්ෂ ජනරාල්වරයා, අරලගංවිල පොලිසියේ ස්ථානාධිපතිවරයා, මහවැලි අධිකාරියේ අධ්‍යක්ෂ ජනරාල්වරයා ඇතුළු පාර්ශවයන්ට යොමු කරන ලෙසත් ශ්‍රේෂ්ඨාධිකරණය සිය තීන්දුවේ වැඩිදුරටත් සඳහන් කර තිබේ.