මාතර බන්ධනාගාරයේ බෝ ගසක අත්තක් කඩා වැටිමෙන් සිදුවු අනතුරෙන් පසුව 54 වගන්තිය යටතේ රඳවා සිටින රැඳවියන් අඟුණුකොළපැලැස්ස බන්ධානාගරය වෙත මාරුකිරීමට අවශ්‍ය කටයුතු මේ වන විට සුදානම් කරමින් පවතින බව මාතර බන්ධනාගාර අධිකාරි මංගල වැලිවිට මහතා පවසයි.
ඔහු පැවසුවේ මාතර බන්ධනාගාරය තුළ පවතින් ඉඩකඩ සීමාවීම හේතුවෙන් මෙම පියවර ගත් බවය.
බෝ ගසේ අත්ත කඩා වැටිමෙන් සිදුවු අනතුරෙන් G හා F යන වාට්ටු දෙකට දැඩි හානි සිදුව තිබේ.
මේ අතර, අනතුරෙන් මියගිය රැඳවියා මත්ද්‍රව්‍ය ජවාරම් කිරීම සම්බන්ධයෙන් රුපියල් 20,000ක දඩයක් නියම වී එම දඩය නොගෙවීම හේතුවෙන් බන්ධනාගාරගතව සිටි මිදිගම තුර්කි ගම්මානයේ පදිංචිව සිටි අයෙක් බව සඳහන් වේ.
මෙවන විට බන්ධනාගාරය අවට ආරක්ෂාව පොලීසිය හා පොලිස් විශේෂ කාර්ය බළකාය විසින් ද බන්ධනාගාරය තුළ ආරක්ෂාව ගාල්ල හා මාතර බන්ධනාගාරයේ බන්ධනාගාර නිලධාරින් විසින්ද තහවුරු කොට ඇති අතර බන්ධනාගාරය තුළ කටයුතු සාමන්‍ය පරිදි සිදු වෙමින් පවතින බව මංගල වැලිවිට මහතා පවසයි.
තුවාල ලැබු රැඳවියන් 11 දෙනා මේ වනවිට මාතර මහා රෝහලේ ප්‍රතිකාර ලබමින් සිටින අතර ඉන් එක් අයෙකුගේ තත්ත්වය බරපතළ වාර්තා වේ.
ඊයේ (01) රාත්‍රීයේ බෝ ගසක අත්තක් කඩා වැටිමෙන් මාතර බන්ධනාගාරයේ G හා F යන වාට්ටු දෙකෙහි සිටි රැඳවියන් 12 දෙනෙකු මාතර රෝහලට ඇතුළත් කළ අතර ඉන් එක් අයෙකු මියගියේය.