පලස්තීනය සඳහා වන ද්විත්ව රාජ්ය සංකල්පය සාක්ෂාත් කරගැනීම වෙනුවෙන් ශ්රී ලංකාව කැපවී සිටින බව ජනාධිපති රනිල් වික්රමසිංහ මහතා පවසයි.
ජනාධිපතිවරයා මේ බව සඳහන් කළේ මැදපෙරදිග රටවල් 10ක තානාපතිවරුන් සමග අද (11) ජනාධිපති කාර්යාලයේ පැවති සාකච්ඡාවේදී ය.
ස්ථීර සහ ක්රියාකාරී පලස්තීන රජයක් පිහිටුවීම වෙනුවෙන් පෙනී සිටින අතරම බටහිර ඉවුරේ (West Bank) සිටින පදිංචිකරුවන් ඉවත් කිරීමට බලධාරීන් තීරණාත්මක පියවර ගැනීමේ අවශ්යතාවය ද ජනාධිපති රනිල් වික්රමසිංහ මහතා මෙහිදී අවධාරණය කළේය.
ජනාධිපති රනිල් වික්රමසිංහ මහතා,
“ශ්රී ලංකාවේ වර්තමාන විදේශ ප්රතිපත්තිය වන්නේ අරාබි රටවල් සමග සමීප සහයෝගීතාවක් පවත්වා ගැනීමයි.
ඉතා ඉක්මණින් ලබන වසරේදී හෝ කසක්ස්තානයේ තානාපති කාර්යාලයක් විවෘත කිරීමට බලාපොරොත්තු වනවා. කාබුල් නුවර තිබූ තානාපති කාර්යාලය වෙනුවට පිහිටුවන එම තානාපති කාර්යාලය හරහා මධ්යම ආසියානු ජනරජ සමග අපට සම්බන්ධවන්න පුළුවන්.”
“පලස්තීනය සහ ගාසා තීරය අතර දැනට පවතින යුද්ධය සම්බන්ධයෙන් ශ්රී ලංකාවේ ස්ථාවරය ඉතා පැහැදිලියි. අපි සැමවිටම කියා තිබෙනවා කිසිවෙකුට ජාතියක් මුලිනුපුටා දැමීමට නොහැකි බව. හමාස් සංවිධානය විසින් ඊශ්රායලයට එල්ලකළ ප්රහාර, ගාසා තීරයේ වසන සමස්ත ජනප්රජාව අතුගා දැමීම සඳහා නිදහසට කරුණක් ලෙස යොදාගත නොහැකියි.”
“දැන් ගාසා තීරය මුළුමනින්ම පාහේ විනාශ කර තිබෙන්නේ. ගාසා තීරයේ සටන් විරාමයක් වහාම ඇතිවනු දැකීම අපට අවශ්යයි. ඒවගේම ගාසා තීරයට සහනාධාර යා යුතුයි. එවැනි සටන් විරාමයක් ඇතිවු විට ශ්රී ලංකාවේ අපත් හැකි අයුරින් ගාසා තීරයට සහනාධාර යැවීමට සූදානම්. අපට ඇති සීමිත සම්පත්වලින් වුවත් ගාසා තීරයේ එක් පාසලක් ඉදිකිරීමට අප සූදානම්.”
“ඒ වගේම පලස්තීන බටහිර ඉවුරෙන් යුදෙව් පදිංචිකරුවන් ඉවත්කරගත යුතුයි. ඔවුන් කියනවා ගාසා තීරයේ හමාස් මුලිනුපුටා දමනවා කියලා. ඒ වගේම රතු මුහුද ආශ්රිත ප්රශ්නේදී නෞකා යැවීමේ ධාරිතාවක් අපට නැහැ. නාවික හමුදාව කියන්නේ ඔවුන් එහි යනවානම් යම් ආවරණයක් සහිතව යන බවයි.”
“ඉන්දියන් සාගරයේ නෞකා ගමනාගමනයට නිදහස තිබුණොත් අපට ඒ සබඳතාව ගොඩනගාගත හැකියි. නමුත් මේ කාරණයේදී අපි අරාබි ලෝකය ගන්න ඕනෑම ක්රියාමාර්ගයකට සහාය දක්වනවා.”
මෙම සාකච්ඡාව සඳහා ශ්රී ලංකාවේ පලස්තීන තානාපතිවරයා ප්රමුඛ, ඊජිප්තුව, කටාර්, එක්සත් අරාබි එමීර් රාජ්යය, ලිබියාව, ඉරානය, කුවේට්, සෞදි අරාබිය, ඕමානය සහ ඉරාකය යන රටවල තානාපතිවරුන් එක්ව සිටියහ.