සිය පුත්‍රයා කෝප් කමිටු පරිශ්‍රයේ රඳවා තබාගැනීම සම්බන්ධයෙන් නිවේදනයක් නිකුත් කරන මහාචාර්ය රංජිත් බණ්ඩාර මහතා පෙන්වා දෙන්නේ තමන් කළ ඉල්ලීමට අනුව තම සම්බන්ධීකරණ ලේකම් කණිෂ්ක බණ්ඩාර මහතාට කෝප් කමිටුව පැවැත්වෙන පරිශ්‍රයේ රැඳී සිටිමට 2022 ඔක්තෝබර් 13 වනදා පාර්ලිමේන්තුවේ සහකාර වේත්‍රධාරියා අවසර ලබාදී ඇති බවය.
එසේම මීට පෙර වෙනත් විෂයන් සම්බන්ධයෙන් කෝප් කමිටු රැස්වීම් පැවැත්වූ අවස්ථාවන්හිද කණිෂ්ක බණ්ඩාර මහතා එම පරිශ්‍රයේ රැඳී සිට ඇති බව මහාචාර්ය රංජිත් බණ්ඩාර මහතා නිකුත් කළ ලිපියේ දැක්වෙයි.
එමෙන්ම ශ්‍රී ලංකා ක්‍රිකට් ආයතනය යටතේ ආරම්භ කළ ක්‍රිකට් කැම්පස් ව්‍යාපෘතියක උපදේශකයෙකු ලෙස තමන් සේවය සපයන බවට එල්ල වූ චෝදනාවටද මහාචාර්ය රංජිත් බණ්ඩාර මහතා අද ප්‍රතිචාර දැක්වීය.
ඒ මහතා පවසන්නේ 2018 වසරේ ක්‍රිකට් ආයතනයේ තිලංග සුමතිපාල මහතා සභාපතිධුරය දැරූ කාලවකවානුවේ ක්‍රිකට් පාසලක් ආරම්භ කිරීම සඳහා සංකල්ප පත්‍රිකාවක් සකස් කර දෙන ලෙස ඉල්ලීමක් ඉදිරිපත් වූ අතර කොළඹ ව්‍යාපාර පාසල වෙනුවෙන් එම කටයුත්තේ ප්‍රධාන උපදේශකයකු ලෙස කටයුතු කිරීමට තමන් එකඟ වූ බවය.
කෙසේ වෙතත් එම කටයුත්ත අතරමැද නැවතුනු අතර ඒ වෙනුවෙන් කිසිදු අයකිරීමක් සිදුනොකළ බවද මහාචාර්ය රංජිත් බණ්ඩාර මහතා සිය නිවේදනයෙන් පැහැදිලි කර සිටියි.
මේ සම්බන්ධයෙන් නිවේදනයක් නිකුත් කරන ශ්‍රී ලංකා ක්‍රිකට් ආයතනය පවසන්නේ ශ්‍රී ලංකා ක්‍රිකට් විශ්ව විද්‍යාලය ඉදිකිරීම සඳහාවන ව්‍යාපෘතියේ සංකල්ප පත්‍රිකාව සකස් කිරීම සඳහා Colombo School of Business and Management ආයතනය වෙනුවෙන් මහාචාර්ය රංජිත් බණ්ඩාර මහතා ශ්‍රී ලංකා ක්‍රිකට් ආයතනය හා එක්ව කටයුතු කළද ඒ වෙනුවෙන් ඒ මහතාට කිසිදු ගෙවීමක් කර නොමැති බවය.