බස්නාහිර, සබරගමුව සහ මධ්‍යම පළාත්වලත් ගාල්ල සහ මාතර දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇති විය හැකි බව කාලගුණවිද්‍යා දෙපාර්තමේන්තුව නිවේදනය කරයි.
සබරගමුව පළාතේත් ගාල්ල, මාතර සහ කළුතර දිස්ත්‍රික්කවල ඇතැම් ස්ථානවලට මි.මි. 100ක පමණ තරමක තද වැසි ද ඇතිවිය හැක. වයඹ පළාතේ වැසි වාර කිහිපයක් ඇතිවේ.
ඌව පළාතෙත් අම්පාර සහ මඩකළපුව දිස්ත්‍රික්කවලත් සවස් කාලයේදී හෝ රාත්‍රී කාලයේදී තැනින් තැන වැසි හෝ ගිගුරුම් සහිත වැසි ඇති විය හැකිය.
උතුරු සහ උතුරු-මැද පළාත්වලත් හම්බන්තොට, පුත්තලම සහ ත්‍රිකුණාමලය දිස්ත්‍රික්කවලත් විටින් විට හමන පැ.කි.මී. 40-45ක පමණ තද සුළං ඇති වේ.
ගිගුරුම් සහිත වැසි සමග ඇතිවිය හැකි තාවකාලික තද සුළංවලින් සහ අකුණු මඟින් සිදුවන අනතුරු අවම කර ගැනීමට අවශ්‍ය පියවර ගන්නා ලෙස කාලගුණවිද්‍යා දෙපාර්තමේන්තුමේන්තුව ජනතාවගෙන් ඉල්ලා සිටී.
මේ අතර වාරිමාර්ග දෙපාර්තමේන්තුව සඳහන් කළේ, දින කිහිපයකට පෙර කළු ගඟ ද්‍රෝණියේ කුඩාගඟ ද්‍රෝණියේ ඉහළ කොටසට ඇද හැලුණු සැලකිය යුතු වර්ෂාපතනය හේතුවෙන් ඇති වූ ගංවතුර තත්ත්වය තවදුරටත් පැවතිය හැකි බවය.
වාරිමාර්ග අධ්‍යක්ෂ ඉංජිනේරු. එස්.පී.සී. සුගීෂ්වර මහතා වැඩිදුරටත් මෙලෙස අදහස් දැක්වීය.
“විශේෂයෙන්ම බුලත්සිංහල සහ පාරින්දනුවර ප්‍රාදේශීය ලේකම් කොට්ඨාසවලට අයත් කුඩා ගඟ දෙපස පහත්බිම් ප්‍රදේශවල අතුරු මාර්ග කිහිපයක් මේ වනවිටත් ජලයෙන් යටවී ඇති නිසා වාහන ධාවනය අපහසුයි. ඇතැම් මාර්ගවලට බෝට්ටු සේවාවන් යොදවා තිබෙනවා. මේ තත්ත්වය අද සහ හෙට දිනය තුළ බොහෝ විට පැවතිය හැකියි. දිවයිනේ වෙනත් කිසිදු ප්‍රධාන ගංගාවක ගංවතුර තත්ත්වයක් මේ වනවිට නොමැත.”