පාස්කු ඉරිදා දින එල්ල වූ ත්‍රස්ත ප්‍රරහාරය පිළිබඳව පැවති නඩුවකින් ලබාදුන් තීන්දුව මගින් ප්‍රහාරයේ මහ මොළකරුවන් හෙළිදරව්වී නොමැති බව ජාතික ජන බලවේගයේ පාර්ලිමේන්තු මන්ත්‍රී අනුර දිසානායක පවසනවා. හිටපු ජනාධිපති මෛත්‍රීපාල සිරිසේන ඇතුළු කණ්ඩායම පිළිබඳව ශ්‍රෙෂ්ඨාධිකරණයෙන් දුන් තීන්දුව දී තිබෙන්නේ මූලික අයිතිවාසිකම් නඩුවකට අදාළව බවයි ඔහු කියන්නේ.
“පාස්කු ප්‍රහාරය සම්බන්ධයෙන් වගකිවයුතු කණ්ඩායම් දෙකක් ඉන්නවා. ආරක්ෂක ඇමතිවරයා ලෙස ජනාධිපතිත් ආරක්ෂක අමාත්‍යාංශයේ ලේකම්වරයාත් අගමැතිවරයාත් බුද්ධි අංශයේ ප්‍රධානීන්, පොලිස්පති ඇතුළු කණ්ඩායම් ප්‍රහාරය වළක්වා නොගැනීම සඳහා වගකිවයුතු බව අපි දිගින් දිගට ප්‍රකාශ කළා. නමුත් ආණ්ඩුව දිගින් දිගටම ඒ පිළිබඳ කිසිදු ක්‍රියාමාර්ගයක් අනුගමනය කළේ නැහැ. මේ නිසා වින්දිතයන්ගේ පාර්ශ්වයෙන් 11දෙනෙකු ශ්‍රේෂ්ඨාධිකරණය ඉදිරියේ මූලික අයිතිවාසිකම් නඩුවක් පැවරුවා. එම පෙත්සම් විභාග කළ විනිසුරුවරුන් හත්දෙනෙකුගෙන් යුත් මණ්ඩලයක් ඒකමතිකව තීන්දු කර තිබෙන්නේ වගඋත්තරකරුවන් වගකීම පැහැර හැර ඇති බවයි. ආණ්ඩුක්‍රම ව්‍යවස්ථාවෙන් තහවුරු කර තිබෙන ආගමික නිදහස උල්ලංඝනය කර ඇති බව ශ්‍රේෂ්ඨාධිකරණයේ තීන්දුවෙන් තහවුරු වෙනවා. මෙයට පෙරත් මෛත්‍රීපාල සිරිසේන ආණ්ඩුක්‍රම ව්‍යවස්ථාව කඩකර ඇති බවට ශ්‍රේෂ්ඨාධිකරණ විනිසුරුවරු හත්දෙනෙකු විසින් තීන්දුවක් දී තිබෙනවා.
මෙම තීන්දුව දී තිබෙන්නේ මූලික අයිතිවාසිකම් නඩුවකට අදාළවයි. සාපරාධීව වගකීම් පැහැර හැරීම පිළිබඳව නීතිපතිවරයා ක්‍රියාකරන ආකාරයත් මේ නඩු තීන්දුවත් අපේ නීතිඥ කණ්ඩායම් විසින් අධ්‍යයනය කරමින් ඉන්නවා. මේ තීන්දුව මත ඉදිරි ක්‍රියාමාර්ග ගත යුතු බව අපේ ස්ථාවරයයි. නමුත් මෙම තීන්දුවෙන් මෙම ප්‍රහාරයේ මහ මොළකරුවන් පිළිබඳව හෙළිදරව් වෙන්නේ නැහැ. ඔවුන් පිළිබඳව හෙළිදරව් කිරීම ආණ්ඩුවේ වගකීමක්” බව ජාතික ජන බලවේගයේ නායක අනුර දිසානායක කියනවා.
