මෑතකදී බිත්තර අලෙවිය සඳහා පාලන මිලක් නියම කරමින් පාරිභෝගික සේවා අධිකාරිය විසින් නිකුත් කළ ගැසට් නිවේදනය බලරහිත කරන ලෙස ඉල්ලා ගොනුකර ඇති පෙත්සම දෙසැම්බර් මස 14 වන දා විභාගයට ගැනීමට අභියාචනාධිකරණය නියම කර තිබේ.
බිත්තර නිෂ්පාදකයින්ගේ සංගමය විසින් පෙත්සම ගොනුකර තිබුණි.
එම පෙත්සම අද ප්රසන්ත ද සිල්වා සහ කේ. කේ. ඒ. බී. ස්වර්ණාධිපති යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවනු ලැබීය.
එහිදී වගඋත්තරකරුවන් වෙනුවෙන් පෙනී සිටි අතිරේක සොලිසිටර් ජෙනරාල් සුමති ධර්මවර්ධන මහතා අධිකරණය හමුවේ කරුණු දක්වමින් ආහාර සුරක්ෂිතතා කමිටුවෙන් බිත්තර පිළිබඳව යාවත්කාලීන කරන ලද තොරතුරු ලබාගෙන දැනට නිකුත් කර තිබෙන බිත්තර සඳහා වූ පාලන මිල පිළිබඳව නැවත කරුණු සලකා බැලීමට පාරිභෝගික සේවා අධිකාරිය කටයුතු කරන බව දන්වා සිටියේය.
ඉන් අනතුරුව එම කරුණ කෙරෙහි අවධානය යොමු කළ අභියාචනාධිකරණ විනිසුරු මඩුල්ල පෙත්සම විභාගය සඳහා දෙසැම්බර් මස 14 දා කැඳවන ලෙස නියෝග කළේය.