ගුරුවරු විසින් සිසුන්ට කළ අමානුෂික පහරදීම් නිසා සිසුන් රෝහල් ගත කළ අවස්ථා පිළිබඳව පසුගිය දින කිහිපය පුරාම තොරතුරු වාර්තා වෙයි.
එවැනි තවත් සිදුවීමක් පාදුක්ක ප්රදේශයෙන් වාර්තා විය.
එහිදී පහරකෑමට ලක්ව තිබුණේ පාදුක්ක ප්රදේශයේ පාසලක 10 වැනි වසරේ ඉගෙනුම ලබන සිසුවෙකි.
ඔහු පවසන්නේ පසුගිය 8 වනදා පාසලේ බුද්ධ ධර්මය විෂය උගන්වන ගුරුවරයා තමන්ට පහරදීමක් කළ බවය.
පහරදීම පිළිබඳව පංතිභාර ගුරුතුමියට පැවසූ පසුව සිසුවාට ලැබී ඇත්තේ අමුතුම ප්රතිචාරයකි.
පහරකෑමට ලක්වූ සිසුවා පවසන්නේ, “අංශභාර ගුරුවරිය ළඟට එක්කගෙන ගියාම කිව්වා කන්බෙරය පැළිලා නැත්නම් අනිත් කනත් පැළෙන්න ගහනවා කියලා,” යනුවෙන් පැවසූ බවය.
අනතුරුව මව්පියන් විසින් සිසුවා හෝමාගම ප්රදේශයේ පෞද්ගලික රෝහලකට සහ හෝමාගම මූලික රෝහල වෙත රැගෙන ගොස් තිබුණි.
එහිදී වෛද්යවරුන් පවසා ඇත්තේ පහරදීමෙන් සිසුවාගේ වම් කනට හානි සිදුව ඇති බවය.
පාදුක්ක පොලීසියේ ස්ථානාධිපතිවරයා පැවසුවේ සිද්ධිය සම්බන්ධයෙන් පහරදීම සිදුකළ ගුරුවරයා අත්අඩංගුවට ගෙන ඇති බවත් ඔහුව අද (18) හෝමාගම මහෙස්ත්රාත් අධිකරණය වෙත ඉදිරිපත් කරන බවත්ය.
දරුවන්ට අවවාද අනුශාසනා කරමින් ඔවුන් යහමඟට යොමුකිරීම ගුරුවරුන්ගේ වගකීමක් වුවත් දරුවන්ගේ ජීවිත වලට පවා බලපෑම් වන මෙවැනි දඩුවම් කිරීම් සමාජය කිසිවිටෙකත් අනුමත නොකරයි.
පහරකෑමට ලක්වූ සිසුවා පැවසුවේ, “බුද්ධ ධර්මය පීරියඩ් එක තියෙද්දි සර් ඇවිල්ලා අච්චු පොත් ගන්න කියලා කිව්වා. මම අච්චු පොත දාලා ඇවිල්ලා තිබුණෙ. පිටිපස්සෙ පෝලිම්වල ළමයි කෑ ගැහුවා. ඒ ළමයින්ට බැන්නා දෙතුන් සැරයක්ම. කියන දේ ඇහුවෙ නැහැ. මම පිටිපස්සෙ ළමයෙකුගෙන් අච්චු පොත ඉල්ලුවා. අච්චු පොත ඉල්ලද්දි පිටිපස්සෙ ළමයා එක්ක කෑ ගහනවා කියලා හිතලා තමයි සර් ළඟට ඇවිත් කොලර් එකෙන් අල්ලලා නැගිට්ටලා හයියෙන් අත දිගඇරලා ගැහුවා කම්මුලට. ඊට පස්සේ කන හෝ ගාන්න අරගෙන කූං ගාලා අමාරු වුණා. පන්තිභාර මිස් කිව්වා සෙමට හින්දා වෙන්න ඇති කන රිදෙනවා ඇත්තෙ. ඩෙස්ක් එකෙන් ඔලුව තියාගන්න කිව්වා. ඔලුව තියාගෙන ඉන්නකොට අංශභාර මනෝරි මිස් ආවා. එයා ඇවිල්ලා නැගිට්ටලා බැන්නා උඹ මේ හදන්නෙ සර් ව පොලිසි ගෙනියන්නද? වරෙන් යන්න ඉස්පිරිතාලෙට කියලා අතින් ඇදගෙන යන්න හැදුවා. කන බලලා කන්බෙරය පැළිලා තිබුණෙ නැත්නම් අනිත් කනත් පලනවා කිව්වා.”