පාදුක්ක – කොළඹ මාර්ගයේ ලියන්වල තුත්තිරිපිටිය ප්‍රදේශයේ දී සිදුවු මාරක අනතුරකින් තරුණයින් දෙදෙනෙක් මියගොස් තිබේ.
ධාවනය වෙමින් තිබූ බස් රථයකට ඉස්සර කිරීමට ගිය මෝටර් රථයක, යතුරු පැදියක් ගැටීමෙන් ඊයෙ (04) සවස එම අනතුර සිදුව තිබුණි.
අනතුරින් මියගිය තරුණයින් දෙදෙනා මීගොඩ දෙසට ගමන් කරමින් සිටියදී පාදුක්ක දෙසට පැමිණි මෝටර් රථයක් ඉදිරියෙන් ගමන් කළ බස් රථයකට ඉස්සර කිරීමට යාමේදී යතුරු පැදියෙහි ගැටී අනතුර සිදුවූ බව පොලිස් පරීක්ෂණවල දී අනාවරණය විය.
අනතුරින් තුවාල ලැබූ තරුණයින් දෙදෙනා හෝමාගම මූලික රෝහලට ඇතුළත් කරන විටද මිය ගොස් සිටි බවත් මෝටර් රථයෙහි ගමන් ගත් යුවළක්ද රෝහල් ගත කර ඇති බවත් මීගොඩ පොලීසිය පැවසීය.
මෙලෙස මියගොස් ඇත්තේ රත්නපුර ප්‍රදේශයේ පදිංචිව සිටි අවුරුදු 22ත් 24ත් වන තරුණයින් දෙදෙනෙකි.
අනතුර සිදුවන අවස්ථාවේදී තද වැසි සහිත කාලගුණයක් පැවති ඇති අතර, අනතුර සිදුවු අවස්ථාවේ දී යතුරුපැදිය මීටර් 25ක් පමණ දුරකට විසි වී ගොස් තිබූ බව ද පොලීසිය පවසයි.
අනතුරට සම්බන්ධයෙන් මෝටර් රථයේ රියදුරු ප්‍රතිකාර ලබාගැනීමෙන් පසු අත්අඩංගුවට ගෙන හෝමාගම මහෙස්ත්‍රාත් අධිකරණය වෙත ඉදිරිපත් කිරීමට නියමිතය.