කොළඹ ප්‍රසිද්ධ පාසලක 06 වසරේ ඉගෙනුම ලබන 11 හැවිරිදි සිසුවකුට අමානුෂික ලෙස පහර දීමේ සිද්ධිය සම්බන්ධයෙන් අත්අඩංගුවට ගෙන අධිකරණයට ඉදිරිපත් කළ ගුරුවරයෙකු ඇපමත මුදාහරින ලෙස කොළඹ මහේස්ත්‍රාත් අධිකරණය නියම කළා.
බම්බලපිටිය පොලිසිය මගින් අත්අඩංගුවට ගත් මෙම සැකකරු කොළඹ අතිරේක මහේස්ත්‍රාත් ශිලනි පෙරේරා මහත්මිය හමුවට පමුණුවන ලැබුවා.
සැකකාර ගුරුවරයා විසින් සිදුකළ අමානුෂික පහරදීම හේතුවෙන් තම දරුවා වමනය කිරීමට පටන් ගත් බවත් ඉන් අනතුරුව රෝහල් ගත කර නේවාසිකව ප්‍රතිකාර ගත් බවත් එම දරුවාගේ දෙමව්පියන් විසින් පොලීසියට කළ පැමිණිල්ලේ සඳහන් කර තිබුණා.
එම පහරදීම් හේතුවෙන් දරුවාට අභ්‍යන්තර තුවාල සිදුවී ඇති බවට වෛද්‍ය වාර්තා ඉදිරිපත් කර ඇතැයි ද දරුවාගේ අයිතිවාසිකම් වෙනුවෙන් පෙනී සිටි නීතිඥ කුමාර වෙල්ගම මහතා සදහන් කළා.
මෙම සිද්ධිය සම්බන්ධයෙන් පරීක්ෂණ සිදුකරන බව ද පොලිසිය අධිකරණයට දන්වා සිටියා.
ඉදිරිපත් වූ කරුණු සලකා බැලූ මහේස්ත්‍රාත්වරයා අදාළ සැකකාර ගුරුවරයා රුපියල් ලක්ෂ 5 බැගින් වූ ශරීර ඇප දෙකක් මත මුදා හැරීමට නියෝග කළා.