ප්රතිපත්ති පොලී අනුපාතික ඉහළ දැමීම හරහා වෙළඳපොළ පොලී අනුපාතය ද ඉහළ යන බව මහ බැංකු අධිපති ආචාර්ය නන්දලාල් වීරසිංහ මහතා පවසයි.
අද (26) පැවති මාධ්ය හමුවේ දී මාධ්යවේදියෙකු නැගූ පැනයකට පිළිතුරු ලබා දෙමින් ඒ මහතා මේ බව පැවසීය.
එහිදී ඔහු වැඩිදුරටත් සඳහන් කර සිටියේ ප්රතිපත්ති පොලී අනුපාතික ඉහළ දැමීමේ ප්රධානතම බලාපොරොත්තුව වන්නේ වෙළඳපොළ පොලී අනුපාතය ඉහළ දැමීම වන බවය.
එනම් අනවශ්ය ලෙස ණය ලබා ගැනීමේ ප්රමාණය යම් ආකාරයකට අඩු කිරීම මෙහි අපේක්ෂාව වන බවද නන්දලාල් වීරසිංහ මහතා සඳහන් කළේය.
එමෙන්ම ආර්ථිකයේ කිසිදු හැකිලීමක් මේවන තෙක් සිදුව නොමැති බවත් ඊළඟ වාරික දෙක තුළ ද ආර්ථිකය වර්ධනය වනු ඇතැයි බලාපොරොත්තු වන බවත් ඔහු කියා සිටියේය.
එහිදී අදහස් දැක්වූ මහ බැංකු අධිපති ආචාර්ය නන්දලාල් වීරසිංහ මහතා,
”ප්රතිපත්ති පොලී අනුපාතය වැඩි කිරීමෙන් වෙළඳපොළ පොලී අනුපාතයත් ඒ විදියට වැඩි වෙන්න ඕනනේ. ඒ වැඩි වීම තුළින් ණය ලබා ගැනීම, අවශ්ය ප්රමාණයට වැඩියෙන් ණය ලබා ගැනීම අඩු කිරීම තමයි බලාපොරොත්තු වෙන්නේ. ආර්ථිකය වර්ධනය වෙනවා තාම. එතකොට ඊළඟ වාරික දෙකේදීත් ආර්ථිකය වර්ධනය වෙන එක තමයි බලාපොරොත්තු වෙන්නේ. ඒ කියන්නේ කිසිම ආකාරයක හැකිලීමක් බලාපොරොත්තු වෙන්නේ නෑ. මේ ආර්ථිකය සීයට හතරකින් වර්ධනය වුණා කියන්නේ ආර්ථිකය වර්ධනය වෙනවා. හැකිලීම කියන්නේ ආර්ථිකය සෘණ වෙනවා කියන එක. 2022 සිද්ධ වුණේ ආර්ථික හැකිලීම. ඒ අවස්ථාවේ අපට සංචිත තිබ්බෙත් නෑ. රුපියල් තිබ්බෙත් නෑ රජයට. විනිමය අනුපාතය පාලනයක් නැතුව යනවා. ආයෝජන ආනයනය කරන බඩු මුකුත් නැතුව රට ලොකු අර්බුදයක තිබිච්ච වෙලාවකනේ. එතකොට ඒ වෙලාවේ ආර්ථිකය මුදල් ප්රතිපත්තිය සීයට හතකින් නෙවෙයි සීයට පහළව දාසය වෙනකම් වැඩි වුණානේ. ඒකෙන් ආර්ථිකය යම්කිසි ආකාරයක සංකෝචනය කිරීමෙන් තමයි ස්ථාවර තත්වය ලබා ගන්න පුළුවන් වුණේ. මේ අවස්ථාවේ එහෙම වෙන්නේ නැහැ. ආර්ථික දිගටම වර්ධනය වෙන ගමන් තමයි යම්කිසි ආකාරයට වැඩිපුර තියෙන ඉල්ලුම පාලනය කිරීම තුළින් තමයි මේක යන්නේ… 2023 සහ 2024 විශේෂයෙන් මැදභාගේ ඉඳලා මේ වෙනකම්ම තාමත් සීයට පහක වර්ධනයක් වුණා.. ඒ කියන්නේ ඒක උඩට යනවා කියන එකනේ. පල්ලෙහාට නෙවෙයිනේ යන්නේ. අර නෙගටිව් කියන්නේ කන්ට්රැක්ෂන් කියලා කියන්නේ පල්ලෙහාට යන එක. මේක උඩට යන්නේ. මේ වෙනකන් ගිහිල්ලත් තියෙන්නේ උඩට. මේක දිගටම යන්නෙත් ඒ විදිහට තමා”
මේ අතර වාහන මිලදී ගැනීමට ණය ලබා ගැනීමේ දී අලුතින් එක් කළ බදු හේතුවෙන් වෙළෙඳපොලේ කෘතිමව වාහන මිල ගණන් ඉහළ යා හැකි බවද මහ බැංකු අධිපති ආචාර්ය නන්දලාල් වීරසිංහ මහතා සඳහන් කළේය.
එහිදී ණය වැඩිපුර ගැනීමට සිදු වීම හරහා ණය ලබා ගත් පුද්ගලයාට අනවශ්ය ණය බරක් දැරීමට සිදු වන බව ද මෙහිදී ඔහු පෙන්වා දුන්නේය.
එම තත්ත්වය ණය ලබා ගන්නා පුද්ගලයාට මෙන්ම ණය ලබා දෙන බැංකුවට ද අවධානම් සහගත තත්ත්වයක් විය හැකි බැවින් එකී අවධානම අවම කිරීම සඳහා 50%ක් දක්වා තිබූ අනුපාතය 40%ක් දක්වා පහළ දමා ඇති බවද ඒ මහතා වැඩිදුරටත් පැවසීය.