රුපියල් ලක්ෂ 60 ඉක්මවූ විදේශීය නිෂ්පාදිත දුම්වැටි තොගයක් නීතිවිරෝධී ලෙස මෙරටට රැගෙන ආ විදේශීය ගුවන් මගීන් තිදෙනෙකු අද (25) අලුයම ගුවන් තොටුපොළ රේගු නිලධාරීන් විසින් අත්අඩංගුවට ගෙන තිබේ.
මෙලෙස අත්අඩංගුවට ගෙන ඇත්තේ අවුරුදු 31,36,40 යන වයස්වල පසුවන චීන ජාතික ව්යාපාරිකයින් තිදෙනෙකි.
සැකකරුවන් විසින් දුම්වැටි තොගය කිසිවක් ප්රකාශ කිරීමට නොමැති හරිත මාවත ඔස්සේ පිටකරගෙන යාමට තැත් කිරීමේදී රේගු නිලධාරීන් විසින් අත්අඩංගුවට ගෙන ඇත.
සැකකරුවන් විසින් රේගු නිලධාරීන්ගේ අවධානය වෙනතකට යොමු කිරීම සඳහා මෙම දුම්වැටි තොගය චීනයෙන් මිලදී ගෙන මැලේසියාවේ ක්වාලාලම්පූර් නුවර වෙත රැගෙන විත් එතැන් සිට කටුනායක ගුවන් තොටුපොළ වෙත පැමිණ තිබුණි.
එහිදී ඔවුන් විසින් රැගෙන ආ ගමන් මලු 06ක් තුළ දුම්වැටි 40,000ත් අඩංගු දුම්වැටි කාටූන් 202ක් සඟවා තිබියදී රේගු නිලධාරීන් විසින් සොයා ගනු ලැබීය.
රේගු නිලධාරීන් පැවසුවේ මෙම දුම්වැටි තොගයේ වටිනාකම රුපියල් හැට ලක්ෂ හැටදහසක් පමණ වන බවය.
සැකකරුවන් මේ වන විට කටුනායක ගුවන් තොටුපොළ රේගු නිලධාරී අත්අඩංගුවේ පසුවන අතර සිද්ධිය සම්බන්ධව වැඩිදුර විමර්ශන පැවැත්වේ.