ඇමෙරිකානු ජනාධිපති ඩොනල්ඩ් ට්‍රම්ප් ඝාතනය කිරීමට දැරූ අසාර්ථක උත්සාහයට සම්බන්ධ සැකකරු ප්‍රහාරයට මිනිත්තු කිහිපයකට පෙර ලබාගත් ඡායාරූප ඇතුළු නවතම තොරතුරු රැසක් එරට බලධාරීන් විසින් ප්‍රසිද්ධියට පත් කර ඇත.
වොෂින්ටන් හි හිල්ටන් හෝටලයේ පැවති ධවල මන්දිර වාර්තාකරුවන්ගේ වාර්ෂික රාත්‍රී භෝජන සංග්‍රහය ඉලක්ක කරගනිමින් මෙම ප්‍රහාරය සැලසුම් කර තිබුණි.
සැකකරු වන 31 හැවිරිදි කෝල් ඇලන් නමැත්තා, සෙනසුරාදා රාත්‍රී 8.03 ට පමණ හෝටල් කාමරයේ කැඩපතක් ඉදිරියේ ආයුධ සන්නද්ධව සිටින සිය ඡායාරූපයක් ලබාගෙන තිබේ.
කළු පැහැති ඇඳුමකින් සහ රතු ටයි පටියකින් සැරසී සිටි ඔහුගේ සිරුරේ උණ්ඩ, පිස්තෝල, පිහි සහ කම්බි කපන උපකරණ සඟවා තිබූ බව එම ඡායාරූපවලින් පැහැදිලි වේ.
ප්‍රහාරය සැලසුම් කළ අවස්ථාවේ සැකකරු සිය පවුලේ සාමාජිකයන්ට යැවූ විද්‍යුත් තැපැල් පණිවිඩවල සඳහන් කර ඇත්තේ, එහි පැමිණ සිටින අනෙකුත් අමුත්තන්ගේ මරණය “පිළිගත හැකි අතුරු හානියක්” ලෙස තමා සලකන බවයි. එහි ආරාධිතයින් 2,300කට අධික පිරිසක් සහභාගී වී සිටියහ.
සැකකරු සතුව තිබී ‘මොස්බර්ග්’ වර්ගයේ වෙඩි තුවක්කුවක්, මිලිමීටර් 38 පිස්තෝලයක් සහ කිනිසි කිහිපයක් සොයාගෙන ඇත.
ඔහු ආරක්ෂක වළල්ල බිඳගෙන ගොස් නිලධාරියෙකුට ආයුධයක් එල්ල කරන විට වෙනත් නිලධාරියෙකු ඔහුට සිව් වතාවක් වෙඩි තබා අඩපණ කර තිබේ.
ජනාධිපතිවරයා ඝාතනය කිරීමට තැත් කිරීම ඇතුළු බරපතළ චෝදනා තුනක් යටතේ ඔහුට ජීවිතාන්තය දක්වා සිරදඬුවම් නියම වීමට ඉඩ පවතී.