හිටපු කථානායක පාර්ලිමේන්තු මන්ත්රී අශෝක රන්වල මහතා ධාවනය කළ ජීප් රථය තවත් මෝටර් රථයක මුහුණට මුහුණ ගැටී සිදුවූ අනතුර සම්බන්ධයෙන් සපුගස්කන්ද පොලිස් ස්ථානය විමර්ශනයක් ආරම්භ කර තිබේ.
අද (12) පෙරවරුවේ පැවති මාධ්ය සාකච්ඡාවකට එක්වෙමින් පොලිස් මාධ්ය ප්රකාශක සහකාර පොලිස් අධිකාරී එෆ්.යු. වුට්ලර් මහතා මේ බව පැවසීය.
ඔහු පවසා සිටියේ, අනතුරින් තුවාල ලැබූ දෙදෙනෙක් කොළඹ ජාතික රෝහලේද, මාස 6ක බිලිදියක් රිජ්වේ ආර්යා ළමා රෝහලේද නේවාසිකව ප්රතිකාර ලබන බවය.
එමෙන්ම මෙම අනතුරේ රියදුරන් බීමත්ව සිටියාද යන්න පරීක්ෂාකිරීම සඳහා වෛද්ය වාර්තාවක් කැඳවා තිබෙන බවත්, එහි ප්රතිඵලය මත තනතුර තරාතිරම බාධාවක් කර නොගෙන පොලීසිය කටයුතු කරන බවත් ඔහු පැවසීය.
කෙසේ නමුත් මන්ත්රි අශෝක රන්වල මහතා ජාතික රෝහලේ නේවාසිකව ප්රතිකාර ගැනීම නිසා පෙරදින ඔහුගෙන් ප්රකාශයක් ලබාගැනීමට පොලීසිය ගත් උත්සාහය ව්යර්ථ වූ බවද හෙතෙම පැවසීය.
ඒ අනුව අද දහවල් වනවිට වෛද්ය වාර්තවක් ලබාගැනීමට හැකිවනු ඇති බව පොලිස් මාධ්ය ප්රකාශකවරයා පැවසීය.
එමෙන්ම මේ දක්වා කිසිවෙක් මෙතෙක් අත්අඩංගුවට ගැනීමක් සිදුව නොමැති බවද ඔහු සඳහන් කළේය.