ශ්‍රී ලංකා බලධාරීන් විසින් ජාත්‍යන්තර මූල්‍ය අරමුදලේ හදිසි මූල්‍යයන පහසුකම (Rapid Financing Instrument -RFI) යටතේ එක්සත් ජනපද ඩොලර් මිලියන 200ක මූල්‍ය පහසුකමක් ඉල්ලා ඇති බව ජාත්‍යන්තර මූල්‍ය අරමුදල පවසයි.
නිවේදනයක් නිකුත් කරමින් ජාත්‍යන්තර මූල්‍ය අරමුදලේ ශ්‍රී ලංකා දූත මණ්ඩල ප්‍රධානියා වැඩිදුරටත් සඳහන් කරන්නේ මෙම ඉල්ලීම, ජාත්‍යන්තර මූල්‍ය අරමුදලේ විධායක මණ්ඩලයේ අනුමැතියට යටත්ව මේ වන විට සමාලෝචනය කරමින් සිටින බවයි.
ශ්‍රී ලංකාව සඳහා වූ IMF මෙහෙයුම් ප්‍රධානී එවන් පැපගෝගියු සඳහන් කළේ මෑත වසරවල ශ්‍රී ලංකාවට බලපෑ වඩාත්ම විනාශකාරී කුණාටුවක් වන මෙම කුණාටුව යටිතල පහසුකම් විනාශ කර, දහස් ගණනක් අවතැන් කර ඇති අතර රටේ ආර්ථිකය පිළිබඳ කනස්සල්ලක් ඇති කරවන බවය.
මෙම ඉල්ලීමට IMF විධායක මණ්ඩලයේ අනුමැතිය අවශ්‍ය වන අතර, එමඟින් ව්‍යසනයේ ආර්ථික බිඳවැටීමේ පරිමාණය සහ රජයේ පුළුල් මූල්‍ය තත්ත්වය තක්සේරු කරනු ඇතැයි අපේක්ෂා කරන බවද සඳහන්.
“මෙම අභියෝගාත්මක කාල පරිච්ඡේදය තුළ IMF ශ්‍රී ලංකා බලධාරීන් සමඟ සමීපව කටයුතු කරන බවද එවන් පැපගෝගියු නිවේදනයක් නිකුත් කරමින් පැවසීය.
ක්ෂය වූ විදේශ සංචිත, ඉහළ උද්ධමනය සහ අධික ණය බරකින් සලකුණු වූ දිගුකාලීන ආර්ථික අර්බුදයකට මුහුණ දීමට ශ්‍රී ලංකාව අඛණ්ඩව කටයුතු කරන අවස්ථාවක මෙම ඉල්ලීම සිදු කර ඇති බව ඒ මහතා සඳහන් කර සිටී.