තංගල්ල සීනිමෝදර ප්‍රදේශයේ ලොරි රථ තුනක තිබී අයිස් සහ හෙරොයින් මත්ද්‍රව්‍ය සොයා ගැනීමේ සිද්ධිය සම්බන්ධයෙන් අත්අඩංගුවට ගත් සැකකරුවන් තිදෙනෙකු රඳවාගෙන ප්‍රශ්න කිරීමට තංගල්ල මහෙස්ත්‍රාත් අධිකරණය පොලීසියට අවසර ලබා දී තිබේ.
අදාළ මත්ද්‍රව්‍ය සොයාගත් ලොරි රථ දෙකක හිමිකරුවන් දෙදෙනෙකු සහ රෝහලේ දී මියගිය උනාකූරුවේ තුසිත යන අයගේ පුත්‍රයෙකු ඊයේ (24) රාත්‍රී තංගල්ල මහෙස්ත්‍රාත්වරයා හමුවට ඉදිරිපත් කෙරුණි.
එහිදි සැකකරුවන් රඳවාගෙන ප්‍රශ්න කිරීමට පොලීසිය අධිකරණයෙන් අවසර ඉල්ලා සිටි අතර ඔවුන් ලබන 29 වන දින දක්වා රඳවාගෙන ප්‍රශ්න කිරීමට මහෙස්ත්‍රාත්වරයා නියෝග කර තිබේ.
මෙම සිද්ධිය සම්බන්ධයෙන් අත්අඩංගුවට ගත් අයිස් සහ හෙරොයින් මත්ද්‍රව්‍ය සොයාගත් එක් ලොරි රථ හිමිකරුවෙකු සහ එහි රියදුරු ද ලබන 29 වනදා තෙක් රඳවාගෙන ප්‍රශ්න කිරීමට පෙරේදා දිනයේ අධිකරණය නියෝග කර තිබුණි.
මේ අතර තංගල්ල සීනිමෝදර ප්‍රදේශයේ අදාළ මත්ද්‍රව්‍ය සොයාගත් ස්ථානයේ සිට පළාගිය “භූමිතෙලා“ යන අන්වර්ත නාමයෙන් හඳුන්වනු ලබන පුද්ගලයා අත්අඩංගුවට ගැනීම සඳහා පොලීසිය විමර්ශන ආරම්භ කර තිබේ.
ඔහු අත්අඩංගුවට ගැනීම සඳහා පොලිස් කණ්ඩායම් කිහිපයක් යොදවා ඇති බව වාර්තා වේ.
තංගල්ල, සීනිමෝදර ප්‍රදේශයේ නිවසක් තුළ සිටි පුද්ගලයින් තිදෙනෙකු අභිරහස් ලෙස මියයාමත් සමග පොලීසියට ලද තොරතුරු මත සිදුකළ විශේෂ මෙහෙයුමකදී ලොරි රථ 3ක තිබී අයිස් සහ හෙරොයින් මත්ද්‍රව්‍ය කිලෝග්‍රෑම් 705ක තොගයක් පසුගියදා සොයාගෙන තිබුණි.
එහිදී එක්ලොරි රථයක් තුළ තිබී මත්ද්‍රව්‍ය වලට අමතරව ටී – 56 ගිනි අවියක් සහ ඇසුරුම් ඉවත් නොකල නව පිස්තෝල වර්ගයේ ගිනි අවි 5ක් පොලීසිය විසින් සොයාගනු ලැබීය.
අදාළ මත්ද්‍රව්‍ය තොගය විදෙස් රටක සිට මත්ද්‍රව්‍ය ජාවරම් සිදුකරන උනාකූරුවේ ශාන්ත නැමති අපරාධකරුට අයත් බවට පොලීසිය සිදුකළ විමර්ශන වල දී අනාවරණය වී ඇත.
මේ අතර මියගිය පුද්ගලයින් තිදෙනා ද මෙම මත්ද්‍රව්‍ය ජාවාරම්වලට සම්බන්ධ පුද්ගලයින් බවට සිදුකළ විමර්ශන වල දී අනාවරණය විය.
මියගිය පුද්ගලයින්ගේ සිරුරු කොටස් වැඩිදුර විමර්ශන සඳහා රජයේ රස පරීක්ෂක දෙපාර්තමේන්තුව වෙත යොමුකර තිබේ.
රෝහල්ගතව සිටියදී මියගිය පුද්ගලයා, උනාකූරුවේ ශාන්ත නැමැත්තාගේ මෙරට මත්ද්‍රව්‍ය ජාලය මෙහෙයවු උනාකූරුවේ තුසිත යන අය බව වාර්තා වේ.
මේ අතර වැලිගම ඉබ්බාවල ප්‍රදේශයේ පොලිස් විශේෂ කාර්යය බලකාය සිදුකළ විශේෂ සෝදිසි මෙහෙයුමකදී ටී-56 ගිනිඅවි 4ක් සමග පුද්ගලයින් දෙදෙනෙකු අත්අඩංගුවට ගෙන තිබුණි.
මෙලෙස අත්අඩංගුවට පත් වු එක් පුද්ගලයෙකු සංවිධානාත්මක අපරාධ කල්ලි සාමාජිකයෙකු වන “මිදිගම රුවන්ගේ“ සමීපතමයෙකු බව පොලීසිය සඳහන් කළේය.
අත්අඩංගුවට ගත් සැකකරු වඩු කාර්මිකයෙකු වන අතර ඔහු නඳුන් චින්තක නොහොත් හරක් කටාගේ ප්‍රධාන ගෝලයෙකු වන මිදිගම රුවන්ගේ ඥාතියෙකු බව ද සඳහන්ය.
එම මෙහෙයුමේ දී ටී-56 ගිනිඅවි 4ට අමතරව මැගසිනයක් හා උණ්ඩ 27ක්, හෙරොයින් ග්‍රෑම් දෙකක් සහ රුපියල් ලක්ෂ අටකට අධික මුදලක් පොලිස් විශේෂ කාර්ය බලකා නිලධාරීන් සිය භාරයට ගෙන තිබේ.