ඉන්දුනීසියාවේදී අත්අඩංගුවට ගෙන මෙරටට රැගෙන විත් සිටින ප්රබල පාතාල කල්ලි නායකයින් දෙදෙනෙකු බව කියන “බැකෝ සමන්” සහ “තැඹිලි ළහිරු” යන අය ත්රස්තවාදය වැළැක්වීමේ පනත යටතේ රඳවාගෙන ප්රශ්න කරන බව බස්නාහිර උතුර අපරාධ විමර්ශන කොට්ඨාසය කොළඹ මහෙස්ත්රාත් අධිකරණයට දැනුම් දී තිබේ.
එම පොලිස් කොට්ඨාසය විසින් විමර්ශන පිළිබඳ වාර්තාවක් අධිකරණය වෙත ඉදිරිපත් කරමින් කොළඹ අතිරේක මහෙස්ත්රාත් ඕෂද මිගාර මහරච්චි මහතා වෙත මෙම දැනුම්දීම සිදුකර ඇති බව වාර්තාවේ.
ඒ අනුව අදාළ සැකකරුවන් ත්රස්තවාදය වැළැක්වීමේ පනත යටතේ ආරක්ෂක ලේකම්වරයාගෙන් ලබාගත් රැඳවුම් නියෝග මත කොළඹ වරාය පොලිසියේ රඳවාගෙන වැඩිදුර විමර්ශන සිදුකරන බව පොලීසිය දැනුම් දී තිබේ.
ඉදිරිපත් වූ කරුණු සලකා බැලූ මහෙස්ත්රාත්වරයා මෙම විමර්ශනවල ප්රගතිය දෙසැම්බර් 10 වනදා අධිකරණයට ඉදිරිපත් කරන ලෙසත් පොලීසියට නියෝග කළ බව වාර්තාවේ
මේ අතර මුදල් විශුද්ධිකරණ සිද්ධියක් සම්බන්ධයෙන් රක්ෂිත බන්ධනාගාරගත කර සිටින “බැකෝ සමන්” නමැත්තාගේ බිරිඳගෙන් ප්රකාශයක් සටහන් කර ගැනීමට කොළඹ ප්රධාන මහෙස්ත්රාත් අධිකරණය ඊයේ අපරාධ පරීක්ෂණ දෙපාර්තමේන්තුවට අවසර ලබා දුනි.
අපරාධ පරීක්ෂණ දෙපාර්තමේන්තුව අද මෝසමක් ඉදිරිපත් කරමින් මේ වනවිට රක්ෂිත බන්ධනාගාර ගත කර සිටින බැකෝ සමන් නමැත්තාගේ බිරිඳවගෙන් ප්රකාශයක් සටහන් කර ගැනීමට අවශ්ය බව අධිකරණයට දැනුම් දුනි.
ඉදිරිපත් වූ කරුණු සලකාබැලූ කොළඹ ප්රධාන මහේස්ත්රාත් අසංක එස්. බෝදරගම මහතා අදාළ සැකකාරියගෙන් ලබන සඳුදා ප්රකාශයක් සටහන් කර ගැනීමට අපරාධ පරීක්ෂණ දෙපාර්තමේන්තුවට පහසුකම් සලසාදෙන ලෙස බන්ධනාගාර බලධාරීන්ට නියෝග කළේය.
මුදල් විශුද්ධිකරණ චෝදනා සම්බන්ධයෙන් සැකපිට අත්අඩංගුවට ගත් මෙම සැකකාරිය ලබන 18 වනදා දක්වා රක්ෂිත බන්ධනාගාර ගත කිරීමට කොළඹ මහෙස්ත්රාත් අධිකරණය පසුගියදා නියෝග කළේය.