පළාත් පාලන ආයතනවල වැඩි අවධානයක් යොමුව ඇති කොළඹ මහ නගර සභා පුරපති ධුරය වෙනුවෙන් පැවැත්වෙන ඡන්ද විමසීම ඉතා උණුසුම් මුහුණුවරක් ගනු ඇති බව දේශපාලන ආරංචි මාර්ග සඳහන් කළේය.
කොළඹ මහ නගර සභාවේ පුරපති සහ නියෝජ්‍ය පුරපති තෝරාපත් කර ගැනීම වෙනුවෙන් පැවැත්වෙන ඡන්ද විමසීම ජුනි මස 02 වැනිදා පැවැත්වීමට මේ වන විට කටයුතු සූදානම් කරමින් පවතී.
කෙසේ වෙතත් මෙරට තීරණාත්මක පළාත් පාලන ආයතනයක් ලෙස සැලකෙන කොළඹ මහ නගර සභාවේ බලය පිහිටුවීම සඳහා ජාතික ජන බලවේගයට 50% සීමාව ඉක්මවා යාමට හැකියාවක් නොලැබුණු බැවින් වූ එවැනි පසුබිමක මේ සම්බන්ධයෙන් විපක්ෂයේ දේශපාලන පක්ෂවලයද දැඩි අවධානයක් යොමුව පවතී.
කොළඹ මහනගර සභාවේ බලය පිහිටුවීම සඳහා දේශපාලන පක්ෂ සිය උපරිම ශක්තිය ඒ සඳහා යොමු කිරීම හේතුවෙන් මෙම සටන දැඩි මුහුණුවරක් ගෙන ඇති බව දේශපාලන විචාරකයින් පෙන්වා දී තිබේ.
දේශපාලන පක්ෂ අතර මේ වන විට ඒ සම්බන්ධයෙන් රහස් සාකච්ඡාද ආරම්භ වී ඇති අතර ඇතැම් අවස්ථාවල දේශපාලන පක්ෂ සභිකයින් දිනා ගැනීම සඳහා විවිධ වරදාන වරප්‍රසාද ලබා දීමටද ඇතැම් පාර්ශ්ව කටයුතු කරමින් සිටින බවද වාර්තා වේ.
මෙම තත්ත්වය තුළ පළාත් පාලන කොමසාරිස්වරයා විසින් පවත්වන ඡන්ද විමසීමේදි 50%කට වඩා වැඩි ඡන්ද ප්‍රතිශතයක් ලබා ගන්නා ආණ්ඩුවේ හෝ විපක්ෂයේ අපේක්ෂකයා කොළඹ මහ නගර සභාවේ පුරපතිවරයා ලෙස තේරි පත් වනු ඇත.
පසුගිය පළාත් පාලන මැතිවරණයේදී කොළඹ මහ නගර සභාවට තනි පක්ෂයක් ලෙස ජාතික ජන බලවේගයෙන් මන්ත්‍රී ආසන 48ක් හිමිවූ අතර සමගි ජන බලවේගය ඇතුළු විපක්ෂයෙන් මන්ත්‍රී ආසන 69ක් හිමි විය.