සංශෝධිත විදුලි ගාස්තුවේ සහනය කර්මාන්තකරුවන් විසින් පාරිභෝගිකයන්ට නිසිලෙස ලබාදෙන්නේ ද යන්න පිළිබඳ සොයාබැලීම සඳහා සාකච්ඡාවක් එළඹෙන 31වනදා පැවැත්වීමට නියමිත බව මහජන උපයෝගීතා කොමිෂන් සභාව පවසයි.
එම සාකච්ඡාව සඳහා ලංකා වාණිජ මණ්ඩලය, වාණිජ හා කර්මාන්ත මණ්ඩල සම්මේලනය, ශ්‍රී ලංකා හෝටල්කරුවන්ගේ සංගමය, ලංකා ජාතික කර්මාන්ත මණ්ඩලය, ඉදිකිරීම් කර්මාන්ත මණ්ඩලය සහ ඒකාබද්ධ ඇඟලුම් සංගම් සංසඳය කැඳවා ඇති බව එම කොමිසමේ ආයතනික සන්නිවේදන අධක්ෂ ජයනාත් හේරත් මහතා සඳහන් කළේය.
පසුගිය 17වනදා මධ්‍යම රාත්‍රී සිට ඉදිරි මාස 6ක කාලයක් සඳහා විදුලි ගාස්තුව සමස්ථයක් ලෙස සියයට 20 කින් අඩු කිරීමට පියවර ගැනුණි.
එමෙන්ම ගෘහස්ථ අංශය සඳහා සියයට 20කින් විදුලි ගාස්තු අඩුවු අතර ආගමික සිද්ධස්ථාන හා පුණ්‍යාතන සඳහා සියයට 21කින් විදුලි ගාස්තු අඩු කෙරුණි.
හෝටල් සඳහා සියයට 31කින් ද කර්මාන්ත කාණ්ඩය සඳහා සියයට 30කින්ද විදුලි ගාස්තු අඩු කළ අතර පොදු කාර්ය කාණ්ඩය සඳහා විදුලි ගාස්තු සියයට 12කින් අඩු කළේය.
රාජ්‍ය ආයතන සහ වීථි ලාම්පු සඳහා සියයට 11කින්ද ගාස්තු අඩු කිරීමට මහජන උපයෝගීතා කොමිෂන් සභාව පියවර ගනු ලැබීය.