යුරෝපියන් එයාර් ලයින් ගුවන් සේවයට අයත් ගුවන්යානයක් පළමු වරට බල්ගේරියානු සංචාරකයන් 180 දෙනකු රැගෙන බල්ගේරියාවේ සොෆියා ගුවන්තොටුපළේ සිට පියාසර කර ඊයේ (27 දා) උදෑසන 9.30ට පමණ මත්තල ගුවන්තොටුපළට ගොඩබෑවේය.
නව රජය බලයට පත්වීමෙන් පසු සංචාරක අමාත්‍යංශය සහ යුරෝපියන් එයාර් ලයින් ගුවන් සමාගම අතර පැවැති සාකච්ඡාවලින් අනතුරුව මෙම ගුවන්යානය මත්තල ගුවන්තොටුපළට පැමිණ තිබේ. පසුගිය කාලයේදී හදිසි ගුවන්යානා ගොඩබෑමේ ස්ථානයක් පමණක් බවට මත්තල ගුවන්තොට පත්ව තිබුණි. කෙසේ නමුත් මේ වන විට නව රජය බලයට පත්වීමෙන් පසු මත්තල රාජපක්ෂ ගුවන්තොටුපළට සතියකට ගුවන් ගමන්වාර 15කට වැඩි ප්‍රමාණයක් සංචාරකයින් රැගෙන පැමිණෙමින් තිබේ.
මෙතෙක් කලක් බහුතරයක් මත්තල ගුවන්තොටුපළ භාවිතා කරමින් සංචාරකයින් රැගෙන පැමිණියේ රුසියාව සහ ඒ ආශ්‍රිත රටවලිනි. නමුත් අද වන විට යුරෝපීය ගුවන් සමාගම් ද මත්තලට සංචාරකයින් රැගෙන පැමිණෙයි.
මත්තලින් දිවයිනට පැමිණි සංචාරකයින් පිරිස සහ ගුවන් කාර්ය මණ්ඩලය විසින් මත්තල ගුවන්තොටේදී හරසරින් පිළිගනු ලැබූහ. සංචාරකයින් පිරිස යාල, උඩවලව, සීගිරිය, පොළොන්නරුව, අනුරාධපුර ඇතුළු ප්‍රදේශ රැසක සංචාරය කිරීමට නියමිතය.