ගතවූ පැය 24 තුළ දිවයිනේ විවිධ ප්‍රදේශවල සිදුවූ රිය අනතුරු 10කින් පුද්ගලයින් 13 දෙනෙකු මියගොස් තිබේ.
පොලීසිය ප්‍රකාශ කළේ, හැටන්, පින්නදූව, මාරවිල, අම්බලන්තොට, ගම්පොල, හෙට්ටිපොළ, මඩකලපුව, මිරිහාන, කැබිතිගොල්ලෑව සහ සීදුව යන ප්‍රදේශවලින් එම අනතුරු වාර්තා වී ඇති බවය.
මියගිය පිරිස අතර පදික පුද්ගලයින් සිව්දෙනෙකු වන බව සඳහන්ය.
උත්සව සමය තුළ මාර්ගවල ගමන් කිරීමේ දී වැඩි අවධානයක් යොමු කළ යුතු බවයි පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග මහතා පැවසීය.
“උත්සව සමය එළැඹීමත් සමග මහා මාර්ගවල වැඩි වශයෙන් වාහන ගමනාගමනයක් වගේම පදිකයිනුත් බහුලව ගැවසීමක් දකින්න පුළුවන්. පදිකයන් වශයෙන් ඔබ මාර්ගයේ ගමන් කරන කොට ඉතාම සුපරික්ෂාකාරීව ගමන්කරන්න ඕනේ. ඒ වගේම රියදුරෙක් වශයෙන් ඔබ ඉතාම සැලකිල්ලෙන් මාර්ගයේ ධාවනය කළ යුතුයි.”
මේ අතර මේ වසරේ ගතවූ කාලය තුළ රිය අනතුරුවලින් පුද්ගලයින් 2,243 දෙනෙකු මියගොස් ඇති බව පොලීසිය පවසයි.
ජනවාරි මස පළමුවන දින සිට දෙසැම්බර් 13 වන දින දක්වා කාලය තුළ දිවයින පුරා රිය අනතුරු 22,967ක් වාර්තා වී ඇති අතර ඉන් 2,141ක් මාරක රිය අනතුරු බව පොලීසිය සඳහන් කළේය.
එම කාලය තුළ රිය අනතුරුවලින් බරපතළ තුවාල ලැබූ සංඛ්‍යාව 4,552 දෙනෙකු වන බව ද සඳහන්ය.