දෙස් විදෙස් සංචාරක ආකර්ෂණය දිනාගත් තේජාන්විත හස්තියෙකු වූ ‘දීඝදන්තු 1’ ඊයේ (28) අලුයම දැයට අහිමි විය.
කලාවැව ජාතික වනෝද්යානය සිය නිවහන කරගෙන සිටි මෙම හස්තියා කැකිරාව, ආඬියාගල හිඟුරුවැව ප්රදේශයේ නිවසක් ඉදිරිපිට අනාරක්ෂිත ලෙස ඇද තිබූ විදුලි රැහැනක පැටලී මියගොස් තිබුණි.
උසින් අඩි 08ක් පමණ වූද, අඩි 05ක පමණ දිගකින් යුත් තේජාන්විත දළ යුගලයකට උරුමකම් කී මෙම හස්තියාගේ වාසභූමිය වූයේ කලාවැව ජාතික උද්යානය අවට භූමියයි.
කලාවැව රක්ෂිතයේ විසූ ඇත් පන්තියේ ශරීර ප්රමාණයෙන් මෙන්ම පෙනුමෙන්ද එක හා සමාන ඇතුන් දෙදෙනෙකු වාසය කළ බැවින් ඔවුන් ‘දීඝදන්තු 1’ සහ ‘දීඝදන්තු 2’ ලෙසින් හැඳන්වුණි.
ඉන් ‘දීඝදන්තු 2’ හස්තියා මීට වසර 05කට පමණ පෙර දැයට අහිමි විය.
පරිසරවේදීන් පෙන්වා දෙන්නේ ‘දීඝදන්තු 1’ හස්තියා මියයන විට වයස අවුරුදු 45ත්, 50ත් අතර වයසේ පසුවූ බවය.
අලි මිනිස් ගැටුම්වල ප්රතිඵලයක් ලෙස 2022 වසරේ වනඅලි 433ක් මියගොස් ඇති අතර, පසුගිය වසරේ මුල් මාස 5 තුළදී පමණක් මියගිය වනඅලි ගණන 193කි.
කලින් කලට මෙරට ආණ්ඩු මාරු වූවද දිනෙන් දින වර්ධනය වන අලි මිනිස් ගැටුමට මෙතෙක් නිශ්චිත විසඳුමක් ලබාදීමට කිසිදු ආණ්ඩුවක් සමත්වී නැති බවට එම දත්ත සපයනු ලබන්නේ ප්රභල සාක්ෂියකි.
එවැනි වටපිටාවක වත්මන් රජයෙන් හෝ මෙම ජාතික ගැටලුවට විසඳුමක් නොලැබුණහොත් මෙරට තුළ වෙසෙන අවසන් හස්තියාද මියගිය පසු සෝ සුසුම් පමණක් ඉතිරිවනු නොඅනුමානය.