රටේ පොල් හිඟයට හේතුව බහුජාතික සමාගම් පොල් සංවර්ධන අධිකාරියේ දූෂිත නිලධාරීන් පිරිසක් සමඟ එකතු වී රටේ පොල්, පොල් කිරි සහ පොල් පිටි වශයෙන් රට පටවමින් කරන ගේම් එක යැයි සමස්ත ලංකා පාරම්පරික පොල්තෙල් නිෂ්පාදකයන්ගේ සංගමයේ කැඳවුම්කරු බුද්ධික ද සිල්වා මහතා පැවසීය.
රටේ මිනිස්සුන්ට කන්න තියෙන පොල් වලින් සියයට 70ක් බහුජාතික සමාගම් පොල් කිරි සහ පොල් පිටි වශයෙන් විදේශයන්ට පටවන බවද හෙතෙම ප්‍රකාශ කළේය.
ඔහු මෙසේ පැවසූවේ කොළඹදී පෙරේදා (24) පස්වරුවේ පැවැති ප්‍රවෘත්ති සාකච්ඡාවකදී ය.
ලංකාවේ නිෂ්පාදනය කෙරෙන පොල් දේශීය පරිභෝජනයට හොදටම ප්‍රමාණවත් බවත් අද පවතින තත්වය යටතේ පොල් වත්තක පොල් ගෙඩියක් රුපියල් 120ත් 125 ත් අතර මිලකට අලෙවි කළ හැකි බවත් බුද්ධික ද සිල්වා මහතා පැවසීය.
රටේ නිපදවන පොල් ටික මුලින්ම පාරිභෝජනයටදී ඉතිරි කොටස කර්මාන්ත වලට දෙන්නැයි ඉල්ලීම් කරන බවද ඔහු කීවේය.
පොල්තෙල් සහ පොල් මිල පාලනය කිරීමට පොල් සංවර්ධන අධිකාරියේ ඇති පීඑස් එස් ඔයිල් ෆන්ඩ් වැනි අරමුදල් මේ අවස්ථාවේදී යොදාගෙන කර්මාන්තකරුවන්ට සහ පාරිභෝගිකයන්ට සහන ලබාදෙන ලෙස ඔහු රජයෙන් ඉල්ලීමක් කරයි.