ශ්‍රී ලංකා වයස අවුරුදු 19න් පහළ කණ්ඩායමේ නායකයෙක් ලෙස කටයුතු කර ඇති ධම්මික නිරෝෂණ ගේ ඝාතනය සම්බන්ධයෙන් වැදගත් කරුණු රැසක් හෙළිකර ගැනීමට පොලීසිය සමත්වී තිබේ.
එම ඝාතනයේ වෙඩික්කරු ලෙස කටයුතු කළ පුද්ගලයා සහ තවත් සැකකරුවෙක්ව පොලීසිය විසින් අත්අඩංගුවට ගෙන තිබුණි.
“එම ඝාතනයේ පරීක්ෂණ ගැන අදහස් දැක්වූ නියෝජ්‍ය පොලිස්පති නීතිඥ නිහාල් තල්දූව මහතා පැවසුවේ, “මිට සම්බන්ධ වූ තවත් සැකකරුවෙක් සොයාගැනීමට හැකියාව ලැබුණා. ඔහුත් ඊයේ (19) දිනයේදී අත්අඩංගුවට ගත්තා. ඔහු වයස අවුරුදු 37ක පුද්ගලයෙක්. ගාල්ල ප්‍රදේශයේ පදිංචිකරුවෙක්. මේ ඝාතනය ට තියුණු ආයුධකුත් පාවිච්චි කරලා තියෙනවා. තියුණු කැපුම් තුවාලත් මේ මියගිය පුද්ගලයාගේ ශරීරයේ තියෙනවා. මන්නයකින් පහර එල්ල කරලා ඇති බවට තමයි තෙරතුරු අනාවරණය වෙලා තියෙන්නේ. මුලින් සඳහන් කළ සැකකරු අපි හඳුනාගන්නේ වෙඩික්කරු විදියට. අද දින අත්අඩංගුවට ගත් පුද්ගලයා සමග යම්කිසි ආකාරයකට සම්බන්ධතාවයක් දක්වන කාන්තාවක් අපි අත්අඩංගුවට ගත්තා. අවුරුදු 35ක් වයසැති කාන්තාවක්. ඇය කොස්ගොඩ ප්‍රදේශයේ පදිංචිකාරිනියක්. මනුෂ්‍ය ඝාතනය වෙනුවෙන් මෙම කාන්තාවගේ ගිණුමට මෙම ඝාතනයට පෙර සහ පසු යම්කිසි ආකාරයකට මුදල් ප්‍රමාණයක් ලැබී ඇති බව නිරීක්ෂණය වෙනවා. රුපියල් ලක්ෂයකට අඩු මුදල් ප්‍රමාණයක් වාර දෙකක දී ලැබී තිබෙනවා. අපි සැක කරනවා. අපි දෙවැනි සැකකරුගෙන් සොයාගත්තා මෙම වෙඩිතැබීම සඳහා යොදා ගත් ගිනි අවිය. එය දේශීයව නිෂ්පාදනය කළ ගිනි අවියක්. “