69 ලක්ෂයේ ජනවරමට අමතන සර්වජන බලයේ පළමු ජන රැලිය ඊයේ (18) නුගේගොඩ ආනන්ද සමරකෝන් එළිමහන් රංගපීඨයේදී පැවැත්වුණි.
ඒ එම එකමුතුවේ පක්ෂ සහ සංවිධානවල නායකයන්ගේ ප්‍රධානත්වයෙනි.
”69 ලක්ෂයක ජනතා බලාපොරොත්තු යළි බලගැන්වීම” යන මැයෙන් රැලිය අද පස්වරු 2ට ආරම්භ කෙරුණි.
ඊට සහභාගී වීම සඳහා සර්වජන බලය නියෝජනය කරන දේශපාලන පක්ෂ ස්ථාන 5ක සිට පාගමනින් නුගේගොඩට පැමිණ තිබුණි.
පාර්ලිමේන්තු මන්ත්‍රී උදය ගම්මන්පිල මහතා ප්‍රමුඛ පිවිතුරු හෙළ උරුමය නුගේගොඩ තෙත් බිම් උද්‍යානයේ සිටත්, විමල් වීරවංශ මන්ත්‍රීවරයාගේ ජාතික නිදහස් පෙරමුණ කට්ටිය මංසන්ධියේ සිටත්, වාසුදේව නානායක්කාර මන්ත්‍රීවරයා නායකත්වය දරන ප්‍රජාතන්ත්‍රවාදී වාමාංශික පෙරමුණ පාගොඩ පාරේ සිටත්, කොමියුනිස්ට් පක්ෂ නියෝජතයින් කොහුවල මංසන්ධියේ සිට පාගමනට එක්විය.
ව්‍යවසායක දිලිත් ජයවීර මහතා නායකත්වය දරන මව්බිම ජනතා පක්ෂය ස්ටැන්ලි තිලකරත්න මාවතේ සිට පාගමනින් පැමිණ ජන රැලියට සම්බන්ධ වුණි.
රැලිය අමතමින් ව්‍යවසායක දිලිත් ජයවීර මහතා සඳහන් කළේ,
“රනිල් වික්‍රමසිංහ වැල් පාලමට ජනතාව අරගෙන යන්න හදනකොට අපිට නිහඬව ඉන්න බැහැ. මේ රට මේ විදියට වැටෙන්න ඉඩ දෙන්න බැහැ. මේ දේශපාලනයේ අපි විතරයි වෙනස්. මේක සාම්ප්‍රදායික දේශපාලන රැස්වීමකුත් නෙමෙයි. මේ රට ව්‍යවසායකත්ව රාජ්‍යයක් බවට පත්විය යුතුයි. වෙන ක්‍රමයක් නැහැ.”