මහා පරිමාණ මත්ද්‍රව්‍ය ජාවාරම්කරුවෙකු වන දිනේෂ් පෙරේරා නොහොත් කුඩු සනා නැමැත්තා මත්ද්‍රව්‍ය ජාවාරමෙන් උපයාගත් බව කියන මුදල්වලින් මිලදීගත් අධි සුඛෝපභෝගී නිවාස දෙකක් සහ මෝටර් රථ තුනක් පොලිසිය විසින් ඊයේ තහනම් කර තිබේ.
එම දේපොළවල වටිනාකම රුපියල් කෝටි 10කට ආසන්න බව පොලීසිය පවසයි.
මහා පරිමාණ මත්ද්‍රව්‍ය ජවාරම්කරුවකු වන දිනේෂ් පෙරේරා නොහොත් “කුඩු සනා” නමැත්තා සහ ඔහුගේ සහෝදරයා පසුගියදා මහනුවරදී අත්අඩංගුවට ගෙන අධිකරණයට ඉදිරිපත් කිරීමෙන් පසු රිමාන්ඩ් බන්ධනාගාරගත කරනු ලැබීය.
අනතුරුව පොලිස් මත්ද්‍රව්‍ය නාශක කාර්යාංශය මගින් සැකකරුගේ දේපොළ පිළිබඳව විමර්ශනයක් සිදුකරන ලෙස නීතිවිරෝධී වත්කම් විමර්ශන කොට්ඨාශයට දැනුම්දී තිබුණි.
ඒ අනුව අපරාධ පරීක්ෂණ දෙපාර්තමේන්තුව භාර නියෝජ්‍ය පොලිස්පති රොහාන් ප්‍රේමරත්න මහතාගේ උපදෙස් මත නීති විරෝධී වත්කම් විමර්ශන කොට්ඨාසයේ අධ්‍යක්ෂ ජ්‍යෙෂ්ඨ පොලිස් අධිකාරී ලක්සිරි ගීතාල් මහතාගේ අධීක්ෂණය යටතේ විමර්ශනයක් ආරම්භ කළේය.
අනතුරුව එහි විමර්ශන පැවරුණේ ජාලගත වංචා විමර්ශන ඒකකය වෙතටය.
එහි ප්‍රථිඵලයක් ලෙස අද දිනයේදී “කුඩු සනා” නමැත්තාට අයත් ගෝනපල ප්‍රදේශයේ පිහිටි කෝටි 2කට අධික වටිනාකමකින් යුත් සුඛෝපභෝගී නිවස මෙලෙස පවරාගනු ලැබීය.
එය ඔහුගේ බිරියගේ නමින් මිලදීගෙන ඇති අතර එය මිලදීගැනීමට මුදල් උපයාගත් ආකාරය පිළිබඳව තොරතුරු ඉදිරිපත් කිරීමට ඇය අපොහොසත්වී තිබේ.
අනතුරුව විමර්ශන නිලධාරීන් සැකකරුගේ මවගේ නමින් මිලදීගෙන තිබූ මොරන්තුඩුව ප්‍රදේශයේ නිවසක්ද පවරාගෙන තිබුණි.
එම සුඛෝපභෝගී නිවස නාන තටායකින්ද සමන්විතය.
එහි වටිනාකම පමණක් රුපියල් කෝටි 5කට අධික බව විමර්ශන නිලධාරීන් සඳහන් කළේය.
මේ අතර රුපියල් කෝටි තුනකට ආසන්න වටිනාකමකින් යුත් සුඛෝපභෝගී මෝටර් රථ දෙකක් ඇතුළු මෝටර් රථ තුනක් ද විමර්ශන නිලධාරීන් සිය භාරයට ගෙන තිබුණි.