පොලිස් විශේෂ කාර්ය බළකා සෙබළුන් සමග ගණේමුල්ලේදී පෙරේදා (21) රාත්රියේ ඇතිවූ වෙඩි හුවමාරුවකදී ජීවිතක්ෂයට පත් පාතාලයේ කුලී ඝාතකයා සම්බන්ධයෙන් තවත් තොරතුරු හෙළිවී තිබේ.
එලෙස මියගොස් ඇත්තේ, යුද හමුදාවේ සේවය කර මීට ටික කලකට පෙර ඉන් පළාගොස් සිටි 28 හැවිරිදි ශෙහාන් අසංක නම් ඇහැළියගොඩ ප්රදේශයේ පදිංචිකරුවෙකි.
ඔහු පැට්ටා මංජු නම් අපරාධකරුගේ සහෝදරයා වන දිනේෂ් වසන්ත යන පුද්ගලයාගේ සමීපතමයෙක් වන අතර වෙඩිතැබීම සිදුවූ ස්ථානයේ තිබී මයික්රෝ වර්ගයේ පිස්තෝල අවියක්, පතුරම් ගැබක් හා ඊට යොදන ජීව උණ්ඩ කිහිපයක්ද සොයාගෙන තිබුණි.
මේ අතර වෙඩික්කරු මියයෑමෙන් අනතුරුව දිනේෂ් වසන්ත නම් පුද්ගලයා තවත් අයෙකුට දුරකථන ඇමතුමක් ලබාදී අදාළ සිදුවීම පිළිබඳව විමසන හඬපටයක් ද විමර්ශන නිලධාරීන්ට හමුවී ඇත.
මාර්තු 09 වනදා යතුරුපැදියකින් පැමිණි පුද්ගලයන් දෙදෙනෙකු ජා-ඇළ දී කුඩු අංජු නම් මත්ද්රව්ය ජාවාරම්කරුවකුට වෙඩි තබා පළාගොස් තිබුණි.
විමර්ශන සිදුකළ පොලිස් විශේෂ කාර්ය බලකායේ ගෝනහේන කඳවුරේ නිලධාරීන්ට තොරතුරක් ලැබී තිබුණේ අදාළ වෙඩිතැබීම සිදුකළ පුද්ගලයා ගණේමුල්ල, සුමේධ මාවතේ දෙමහල් නිවසක තවත් අපරාධයක් සිදුකිරීම සඳහා සූදානමින් සිටින බවය.
ඒ අනුව වෙඩික්කරු අත්අඩංගුවට ගැනීමට විශේෂ කාර්ය බළකා නිලධාරීන් කණ්ඩායමක් ඊයේ රාත්රියේ එහි ගොස් තිබුණි.
එහිදී සැකකරු සහ පොලිස් විශේෂ කාර්ය බළකා නිලධාරීන් අතර වෙඩි හුවමාරුවක් සිදුවී ඇති අතර ඉන් තුවාල ලැබූ සැකකරු රාගම රෝහලට ඇතුළත් කිරීමේදී මෙලෙස මියගොස් තිබුණි.
මියගිය පුද්ගලයාට කුඩු අංජු ඝාතනය කිරීමට නොහැකිවීම නිසා කොන්ත්රාත්තුව ලබාදුන් පුද්ගලයා මුදල් ගෙවීමක්ද සිදුකර නොමැති බව පොලීසිය පැවසීය.