රට නවීන කෘෂි ආර්ථිකයක් කරා ගෙන යන ගමනේ දී, මහවැලි ව්‍යාපාරයෙන් අතහැරණු මහවැලි ඒ සහ බී කලාප කඩිනමින් සංවර්ධනය කර ජනතාවට එහි ප්‍රතිලාභ ලබාදීමට කටයුතු කරන බව ජනාධිපති රනිල් වික්‍රමසිංහ මහතා පවසයි.
මෙරට වාරි ඉතිහාසය තුළ සුවිශේෂී පරිවර්තනයක් සිදුකරමින් එදා ගාමිණී දිසානායක මහතා මහවැලි ව්‍යාපාරය ක්‍රියාත්මක නොකළා නම් අද රට සහලින් ස්වයංපෝෂිත කිරීමට නොහැකි වන බවත්, රටට අවශ්‍ය විදුලිය ලබා ගැනීමට නොහැකි වන බවත් ජනාධිපතිවරයා පෙන්වා දුන්නේය.
කීර්තිමත් දේශපාලනඥයකු වූ ගාමිණී දිසානායක මහතාගේ අසූ දෙවැනි ජන්ම දින සැමරුම ජනාධිපති රනිල් වික්‍රමසිංහ මහතාගේ ප්‍රධානත්වයෙන් ඊයේ පැවැත්වූ අතර, එයට සහභාගී වෙමින් ජනාධිපතිවරයා මේ බව කියා සිටියේය.
“ජේ. ආර්. ජයවර්ධන මහත්තයා විපක්ෂයේ සිටියදීත් කතා කළේ මහවැලි යෝජනා ක්‍රමය අවුරුදු 30ක් වෙනුවට අවුුරුදු 10කින් ක්‍රියාත්මක කරන්න කියලා. බොහෝ අය කිව්වා ඒක කරන්න බෑ කියලා. එතුමා හිතුවා ගාමිණීට තමා මේක කරන්න පුළුවන් කිව්වේ. මම කතාකරාමත් කිව්වා ගාමිණී ඉක්මනින් තීරණ ගන්නවා. ඉක්මනින් තීරණ ගන්නේ නැත්නම් මේ ප්‍රශ්නය විසඳන්න බෑ. බලන්න එතුමාට භාරදුන්න වැඩකටයුත්ත. ලංකා ඉතිහාසයේ තිබුණ සියලු වැව් හා සමාන වැව් 5ක් හදන්න කිව්වා. කොත්මලේ, වික්ටෝරියා, රන්දෙණිගල, රන්ටැඹේ හා මාදුරු ඔය කියලා. 1989 වෙද්දි මේකේ වැඩ ඉවරයි. එතැනින් ලංකාවේ වාරි ඉතිහාසය සම්පූර්ණයෙන් වෙනස්වුණා. මේ කටයුත්ත නොකොරුවානම්, හාල්වලින් ස්වයං පෝෂිත නෑ. විදුලිබලය ලැබුණා. මං හිතන්නේ ගාමිණී දිසානායකට විශේෂ තැනක් තියෙනවා මේ රටේ ඉතිාහසයට.”
එම අවස්ථාවට ගාමිණී දිසානායක මහතාගේ පුත්‍රයන් වන සබරගමු පළාත් ආණ්ඩුකාර නවීන් දිසානායක සහ පාර්ලිමේන්තු මන්ත්‍රී මයන්ත දිසානායක යන මහත්වරුන්ද එක්ව සිටියහ.
කෘතහස්ථ දේශපාලනඥයකු වූ ගාමිණී දිසානායක මහතා 1942 මාර්තු 20 වැනිදින උපත ලද අතර ඒ මහතා 1970 වසරේදී නුවරඑළිය දිස්ත්‍රික්කයෙන් පාර්ලිමේන්තුවට පිවිසියේය.
වාරිමාර්ග ,විදුලිබල, මහාමාර්ග, ඉඩම්, මහවැලි සංවර්ධන, වැවිලි කර්මාන්ත ආදී අමාත්‍යධුර ගනනාවක් හෙබවූ ගාමිණී දිසානායක මහතා කඩිනම් මහවැලි සංවර්ධන ව්‍යාපෘතියේ පුරෝගාමියායි.
1994 වසරේ ඔක්තෝබර් මස 24 වැනිදා තොටළඟ පැවති මැතිවරණ ප්‍රචාරක රැළියකට එල්ල වූ LTTE බෝම්බ ප්‍රහාරයකට ගොඳුරුව දිසානායක මහතා ජීවිතයෙන් සමුගත්තේ 52වැනි වියේදීය.
ගාමිණි දිසානායක මහතාගේ 82 වැනි ජන්ම දින සැමරුම් උත්සවය කොළඹ ආනන්ද කුමාරස්වාමි මාවතේ පිහිටි ඒ මහතාගේ පිළිරුව අභියසදී පැවැත්වුණේ ජනාධිපති රනිල් වික්‍රමසිංහ මහතාගේ ප්‍රධානත්වයෙනි.