බලපත්රයක් නොමැතිව වෙබ් අඩවියක් පවත්වාගෙන යමින් යුද හමුදාපතිවරයා ඇතුළු යුද හමුදාවේ ඉහළ නිලධාරීන්ට අපහාස වන අයුරින් පුවත් පළ කළැයි අත්අඩංගුවට ගත් එම වෙබ් අඩවියේ කර්තෘවරයා ලබන 20 වැනි දින තෙක් රිමාන්ඩ් භාරයේ තබන ලෙස අධිකරණය ඊයේ (6 වැනිදා) නියෝග කළේය.
අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන අංශයේ නිලධාරීන් විසින් ඊයේ රාත්රි 10.45 ට පමණ මහයාය, අම්බාවිල, පල්ලේබැද්ද ප්රදේශයේදී අත්අඩංගුවට ගත් ගල්කන්දේ පුරන්වත්තලාගේ නිශ්ශංක නමැති සැකකරු එලෙස රිමාන්ඩ් භාරයේ තබන ලෙස කොටුව මහෙස්ත්රාත් තිළිණ ගමගේ නියෝග කළේය.
මෙම සැකකරු විසින් රාවණ ලංකා නිවුස් නමින් වෙබ් අඩවියක් පවත්වාගෙන ගොස් ඇති බවත්, ඔහු විසින් එහි පළ කරන ලද පුවත් මගින් ජාතික ආරක්ෂාවට සහ මහජන ආරක්ෂාවට තර්ජනයක් එල්ල වී ඇති බවත් අපරාධ පරීක්ෂණ දෙපාර්තමේන්තුවේ නිලධාරීන් දන්වා සිටියේය.
සැකකරු විසින් සිය වෙබ් අඩවියේ යුද හමුදාපතිවරයාගේ කුස්සියත් ඒ.සී. වැනි ශීර්ෂ පාඨද, තවත් පුවතක් මගින් සෙබළියන් ලිංගික කටයුතුවලට යොදාගන්නා බවත් සඳහන් කරමින් යුද හමුදාපතිවරයාට සහ යුද හමුදාවේ ඉහළ නිලධාරීන්ට අපහාස වන අයුරින් විවිධ පුවත් පළකර ඇතැයිද අපරාධ පරීක්ෂණ දෙපාර්තමේන්තුවේ නිලධාරීන් දන්වා සිටියේය.
සැකකරු මෙවැනි අපහාසාත්මක පුවත පළකිරීම තුළින් මහජනතාව යුද හමුදාව පිළිබඳ දරන මතය පහළ දැමීමට උත්සාහ කර ඇතැයිද, එමගින් රටේ භෞමික අඛණ්ඩතාවට තර්ජනයක් එල්ල කර ඇතැයිද අධිකරණයට දීර්ඝ වශයෙන් කරුණු ඉදිරිපත් කරමින් දන්වා සිටි අපරාධ පරීක්ෂණ දෙපාර්තමේන්තුවේ නිලධාරීන් සැකකරුට එරෙහිව තවදුරටත් විමර්ශන සිදුකරන හෙයින් ඔහු රිමාන්ඩ් භාරයේ තබන ලෙස ඉල්ලා සිටියේය.
මෙම සිද්ධියට අදාළව පවත්වන විමර්ශනයේ ප්රගතිය අධිකරණයට වාර්තා කරන ලෙස අපරාධ පරීක්ෂණ දෙපාර්තමේන්තුවට නියම කළ මහෙස්ත්රාත්වරයා සැකකරු රිමාන්ඩ් භාරයේ තබන ලෙසට නියම කළේය.