ලංකා විදුලිබල මණ්ඩලය විසින් යෝජිත විදුලි ගාස්තු අඩුකිරීමට අදාළව මහජන උපයෝගිතා කොමිසම සමඟ පැවති සාකච්ඡා ඊයේ (01) දෙවැනි දිනටත් විසඳුමකින් තොරව අවසන්වී තිබේ.
මණ්ඩලය ඊට අදාළ දත්ත ප්‍රමාණවත් පරිදි ලබා නොදීම හේතුවෙන් මේ තත්ත්වය නිර්මාණය වූ බව මහජන උපයෝගිතා කොමිසම පවසයි.
මෙලෙස කල්යමින් තිබෙන්නේ මේ වසරේ ජනවාරි මාසයේ සිට ක්‍රියාත්මක කිරීමට නියමිතව තිබූ විදුලි ගාස්තු සංශෝධනයයි.
මාස තුනකට වරක් විදුලි ගාස්තු සංශෝධනය කිරීමේ රජයේ නව ප්‍රතිපත්තිය අනුව 2023 වසරේ අවස්ථා 3කදී විදුලි ගාස්තු සංශෝධනය කෙරුණි.
ඒ අනුව පෙබරවාරි 15 ගාස්තු වැඩිකිරීමකට, ජුලි 01 ගාස්තු අඩුකිරීමකට සහ ඔක්තෝබර් 20 නැවතත් ගාස්තු වැඩිකිරීමකට මහජන උපයෝගීතා කොමිසම ලංකා විදුලිබල මණ්ඩලයට අවසර ලබා දුන්නේය.
අවසන් සංශෝධනය කළ ඔක්තෝබර් මාසයේ ගෘහස්ථ කාණ්ඩය සඳහා විදුලි ගාස්තුව ඉහළ නැංවුණේ සියයට 18 ක ප්‍රතිශතයකිනි.
කෙසේ වෙතත් යහපත් ජල විදුලි ධාරිතාව සහ ලාභදායි තත්ත්වය සැලකිල්ලට ගනිමින් විදුලි ගාස්තු අඩුකිරීමට මණ්ඩලය මෙවර යෝජනාවක් ඉදිරිපත් කළත්, ඔවුන්ගේ දත්තවල සඳහන් වියදම් තවදුරටත් කප්පාදු කර නැවත වාර්තාවක් ලබාදෙන ලෙස උපයෝගිතා කොමිසම දැනුම්දී තිබිණි.
ලංකා විදුලි බල මණ්ඩලය නිකුත් කළ අතුරු මූල්‍ය වාර්තාවේ දැක්වුණේ 2023 අවසන් මාස 3 තුළ මණ්ඩලය රුපියල් බිලියන 156.2ක ආදායමක් උපයා රුපියල් බිලියන 77.9ක ‘බදු පසු ලාභයක්’ වාර්තා කර ඇති බවය.
ඒ අනුව විදුලි ගාස්තු අඩුකිරීමට අදාළ සංශෝධිත යෝජනාව මණ්ඩලය පෙබරවාරි 22 වැනිදා මහජන උපයෝගිතා කොමිසමට භාරදුන් අතර ඒ පිළිබඳ සාකච්ඡා කිරීම සඳහා ඊයේ දින එහි නිලධාරීන්ව කොමිසමට කැඳවා තිබිණි.
පැය දෙකකට ආසන්න කාලයක් සාකච්ඡා පැවති නමුත් විදුලි ගාස්තු අඩුකිරීමේ යෝජනාව පිළිබඳ අවසන් තීරණයකින් තොරව සාකච්ඡා අවසන් වී තිබේ.
මණ්ඩලය ඊට අදාළ දත්ත ප්‍රමාණවත් පරිදි ලබා නොදීම හේතුවෙන් මේ තත්ත්වය නිර්මාණය වූ බව මහජන උපයෝගිතා කොමිසම පවසයි.
මෙලෙස දෙවැනි දිනටත් කල් ගියේ මේ වසරේ ජනවාරි මාසයේ සිට ක්‍රියාත්මක කිරීමට නියමිතව තිබූ විදුලි ගාස්තු සංශෝධනයයි.