බෙලිඅත්ත පංච පුද්ගල ඝාතනයේ ප්‍රධාන වෙඩික්කරු ඩුබායි රාජ්‍යයට පළාගොස් ඇති බව පොලීසිය අනාවරණ කරගෙන තිබේ.
බෙලිඅත්තේ පංච පුද්ගල ඝාතනයේ ප්‍රධාන වෙඩික්කරුවා ලෙසට කටයුතු කර ඇත්තේ විශ්‍රාම වැටුප් ලබන නාවික හමුදා සෙබළෙකි.
එම තොරතුරු අනාවරණ වී ඇත්තේ, සැකකරුගේ අවුරුදු 39ක් වන බිරිඳ සහ 72 හැවිරිදි පියා පසුගිය (01) අත්අඩංගුවට ගැනීමෙන් පසු පොලීසියට කරන ලද අනාවරණයකට අනුවය.
පොලිස් විශේෂ කාර්ය බළකායේ ගෝනහේන කඳවුරේ නිලධාරීන් පිරිසක් විසින් පල්ලේවෙල, මුද්දරගම, පාතගම ප්‍රදේශයේදී සැඟව සිටියදී ඔවුන් අත්අඩංගුවට ගෙන තිබුණි.
එහිදී ඔවුන් සතුව තිබී හෙරොයින් ග්‍රෑම් 21යි මිලිග්‍රෑම් 350ක්ද සොයාගෙන ඇත.
අත්අඩංගුවට ගත් සැකකරුවන් පොලීසියට පවසා ඇත්තේ, ප්‍රධාන වෙඩික්කරු වන විශ්‍රාමික නාවික හමුදා සෙබළා, ඝාතනයට පෙර දින බස් රථයෙන් බෙලිඅත්ත ප්‍රදේශයට ගොස් තවත් වෙඩික්කරුවන් දෙදෙනෙකු සමග එක්ව ඇති බවය.
ඝාතනයෙන් පසු ප්‍රධාන වෙඩික්කරු ඩුබායි රාජ්‍යයට පළා ගොස් ඇති අතර ඒ සඳහා ගුවන් ටිකට් පත් සකසා දී ඇත්තේ ඩුබායි රාජ්‍යයේ සිටින නිපුන නැමැති පුද්ගලයෙකි.
සැකකරුවන්ගෙන් සිදුකළ වැඩිදුර ප්‍රශ්න කිරීම්වලදී පසුගිය වසරේ ජුනි 17 වනදා සීනිගම දේවාලය අසලදී රත්ගම ප්‍රාදේශීය සභාවේ හිටපු මන්ත්‍රීවරයෙක් වෙඩි තබා ඝාතනය කිරීම සම්බන්ධයෙන් වූ තොරතුරු ද අනාවරණ වී තිබේ.
එදින වෙඩි ප්‍රහාරයට ලක්ව තිබුණේ රත්ගම ප්‍රාදේශීය සභාවේ හිටපු එක්සත් ජාතික පක්ෂ මන්ත්‍රී දුලාජ් තරංග මහතාය.
ඒ සඳහා ආධාර අනුබල දී ඇත්තේ දොඩන්දූව ප්‍රදේශයේ පදිංචි 23 හැවිරිදි තරුණියක් සහ මුද්දරගම ප්‍රදේශයේ පදිංචි 32 හැවිරිදි පුද්ගලයෙක් බවට සැකකරුවන් පොලීසියට පවසා ඇත.
ඒ අනුව ක්‍රියාත්මක වූ පොලිස් විශේෂ කාර්ය බළකායේ ගෝනහේන කඳවුරේ නිලධාරීන් කිරිබත්ගොඩ ප්‍රදේශයේදී මෙම සැකකාරිය සහ සැකකරු ද පසුගිය (01) අත්අඩංගුවට ගනු ලැබිණි.
23 හැවිරිදි සැකකාරිය සන්තකයේ තිබී අයිස් මත්ද්‍රව්‍ය ග්‍රෑම් 5යි මිලිග්‍රෑම් 580ක්ද සොයාගැනුණු අතර ඇයට බලපිටිය මහ‍ෙස්ත්‍රාත් අධිකරණය මගින් විවෘත වරෙන්තුවක්ද නිකුත් කර තිබේ.
පොලීසිය පැවසුවේ, මොවුන්ට සැඟව සිටීමට ආධාර අනුබල දුන් 45 හැවිරිදි තවත් පුද්ගලයෙක්ද හුණුපිටිය ප්‍රදේශයේදී අත්අඩංගුවට ගත් බවය.
මේ අතර බෙලිඅත්ත පංච පුද්ගල ඝාතනයේ ගිනිඅවි ප්‍රවාහනයට සහාය දුන් රත්ගම ප්‍රදේශයේ පුද්ගලයෙක් අත්අඩංගුවට ගෙන ඊයේ තංගල්ල අධිකරණයට ඉදිරිපත් කරනු ලැබීය.
එහිදී තංගල්ල වැඩබලන මහෙස්ත්‍රාත්වරයා නියෝග කළේ සැකකරු ලබන 13 වනදා දක්වා රක්ෂිත බන්ධනාගාරගත කරන ලෙසය.