ශ්‍රීලංකන් ගුවන් සේවය ප්‍රතිව්‍යුහගත කිරීම වෙනුවෙන් අභිලාෂයන් කැඳවීමේ යෝජනා ඉදිරිපත් කිරීමේ කාලසීමාව නැවත වරක් දීර්ඝ කිරීමට රාජ්‍ය ව්‍යවසාය ප්‍රතිව්‍යුහගත කිරීමේ ඒකකය තීරණය කර තිබේ.
ඒ අනුව ශ්‍රීලංකන් පෞද්ගලීකරණය ක්‍රියාවලිය ඇරඹු දින සිට අභිලාෂයන් කැඳවීමේ සීමාව දීර්ඝ කළ තුන් වැනි අවස්ථාව මෙය වෙයි.
ශ්‍රීලංකන් ගුවන් සේවය පෞද්ගලීකරණය කිරීමේ ක්‍රියාවලිය තවදුරටත් පමාවන බව සලකුණු කරමින් ඒ සඳහා ආයෝජකයන්ට යෝජනා ඉදිරිපත් කළ හැකි කාලසීමාව තුන් වන වරටත් දීර්ඝ කර තිබේ.
රජයේ ආර්ථික ප්‍රතිසංස්කරණ වැඩසටහනේ වැදගත් ඉදිරි පියවරක් ලෙසින් ගුවන් සමාගමේ කොටස් මිලදී ගැනීම සඳහා අභිලාෂයන් කැඳවීම පසුගිය වසරේ ඔක්තෝබර් 31වැනිදා සිදුකෙරුණු අතර එහිදී අභිලාෂයන් කැඳවීමේ අවසන් දිනය දැක්වුණේ පසුගිය වසරේ දෙසැම්බර් මස 05 වැනිදා ලෙසය.
කෙසේවෙතත් ප්‍රමාණවත් ආකර්ෂණයක් නොමැතිවීම හේතුවෙන් ශ්‍රීලංකන් ගුවන් සේවය සඳහා අභිලාෂයන් කැඳවීම ඉන් අනතුරුව දෙසැම්බර් 18 වැනිදා දක්වාත්, පසුව මේ වසරේ ජනවාරි මස 09 වැනිදා දක්වාත් දීර්ඝ කිරීමට රාජ්‍ය ව්‍යවසාය ප්‍රතිව්‍යුහගත කිරීමේ ඒකකය තීරණය කළේය.
ඒ අනුව දැන් එය තුන්වැනි වතාවටත් මේ වසරේ පෙබරවාරි මස 16 වැනිදා දක්වා නැවත දීර්ඝ කර ඇති බවෙ වාර්තා වෙයි.
රජය සතු පාඩු ලබන ව්‍යවසායන් ප්‍රතිව්‍යුහගත කිරීම යටතේ ශ්‍රීලංකන් ගුවන් සේවය ප්‍රතිව්‍යුහගත කිරීම සිදුවන්නේ ජාත්‍යන්තර මූල්‍ය අරමුදලේ නිර්දේශය යටතේය.
කෙසේවෙතත් ශ්‍රීලංකන් ගුවන් සේවය පසුගිය කාලය තුළ මූල්‍ය දුෂ්කරතා රැසකට මුහුණ පෑ අතර මේ වනවිට ගුවන් සේවය රජයේ මූල්‍ය සහායක් නොමැතිව පවත්වාගෙන යනු ලබයි.