ආධුනික නීතිඥවරයෙකුට මහමගදී පහරදුන් තවත් නීතිඥවරුන් සහ නීතිඥවරියන් ඇතුළු 5 දෙනෙකු ඊයේ අධිකරණය විසින් ඇප මත මුදාහැර තිබේ.
සැකකරුවන් අධිකරණය හමුවට ඉදිරිපත් කිරීමෙන් අනතුරුව අත්තනගල්ල මහෙස්ත්‍රාත් මංජුල කරුණාරත්න මහතා නියෝග කර ඇත්තේ රුපියල් ලක්ෂය බැගින් වූ ශරීර ඇප මත ඔවුන්ව මුදාහරින ලෙසටය.
සැකකරුවන් විසින් මෙලෙස පහරදී ඇත්තේ නිට්ටඹුව ප්‍රදේශයේ පදිංචිව සිටින තරුණ නීතිඥවරයෙකුට බව පොලීසිය පවසයි.
මූලික විමර්ශනවලදී හෙළිවී ඇත්තේ පහරකෑමට ලක්ව ඇති ආධුනික නීතිඥවරයා සහ ජ්‍යේෂ්ඨ නීතිඥවරියක් අතර බහින් බස්වීමක් සිදුව ඇති බවය.
අනතුරුව වෙනත් ජ්‍යේෂ්ඨ නීතිඥවරයෙකු අත්තනගල්ල මහෙස්ත්‍රාත් අධිකරණය වෙත පැමිණ පහරකෑමට ලක්ව ඇති තරුණ නීතිඥවරයා කළගෙඩිහේන ප්‍රදේශයට කැඳවාගෙන ගොස් තිබේ.
අනතුරුව බහින්බස්වීම සිදුවූ ජ්‍යේෂ්ඨ නීතිඥවරියගේ නිවස ආසන්නයේදී අදාළ සැකකාර නීතිඥවරුන් සහ නීතිඥවරියන් ඇතුළු පිරිසක් තමන්ට පහරදුන් බව තරුණ නීතිඥවරයා පවසා ඇත.
එහිදී ඔවුන් විසින් ජ්‍යේෂ්ඨ නීතිඥවරියගෙන් සමාව ගන්නා ලෙසට තමන්ට තර්ජනය කළ බවත් ඒ අනුව තමන් එම ජ්‍යේෂ්ඨ නීතිඥවරියගෙන් සමාව ගැනීමෙන් අනතුරුව නැවත අධිකරණ භූමිය වෙත ගෙනවිත් දැමූ බවත් ඔහු සඳහන් කර ඇත.
සිද්ධිය සම්බන්ධයෙන් පොලීසිය වැඩිදුර විමර්ශන සිදුකරයි.