ඉහළ පෙළේ සංචාරක කර්මාන්තය ඉලක්ක කර ගනිමින් හෝර්ටන් තැන්න ආශ්රිත කලාපය සංවර්ධනය කිරීමේ අවශ්යතාව ජනාධිපති රනිල් වික්රමසිංහ මහතා පෙන්වා දී තිබේ.
හෝර්ටන් තැන්න ජාතික වනෝද්යානය සහ ඒ ආශ්රිත ප්රදේශය ඉහළ පෙළේ සංචාරකයන්ගේ (High-end Tourism) කේන්ද්රස්ථානයක් ලෙස සංවර්ධනය කිරීමේ අවශ්යතාව ජනාධිපති රනිල් වික්රමසිංහ මහතා මෙහි දී පෙන්වා දී ඇත.
ජනාධිපතිවරයා මේ බව පෙන්වා දුන්නේ, ඊයේ (15) පෙරවරුවේ හෝර්ටන් තැන්න ජාතික වනෝද්යානයේ නිරීක්ෂණ චාරිකාවකට එක් වෙමිනි.
හෝර්ටන් තැන්න ජාතික වනෝද්යානයේ අඩවි කාර්යාලය වෙත පැමිණි ජනාධිපතිවරයා, එහි තැන්පත් කර ඇති විශේෂ අමුත්තන්ගේ පොතේ සමරු සටහනක් ද තැබූ අතර, අනතුරුව ඔහිය මාර්ගය ඔස්සේ වනෝද්යානයේ නිරීක්ෂණ චාරිකාවකට එක්විය.
හෝර්ටන් තැන්න ජාතික වනෝද්යානය ආශ්රිතව වනජීවි දෙපාර්තමේන්තුවට සහ වන සංරක්ෂණ දෙපාර්තමේන්තුවට අයත් භූමි ප්රදේශ ද මෙහි දී ජනාධිපති රනිල් වික්රමසිංහ මහතා සිතියම් මූලාශ්රයෙන් නිරීක්ෂණය කළ අතර, හෝර්ටන් තැන්න ජාතික වනෝද්යානය සහ එහි පේරක කලාපයට අයත් සියලු ඉඩම් එක් සිතියමකට සිතියම්ගත කර කඩිනමින් තමා වෙත ලැබීමට සලස්වන ලෙස නිලධාරීන්ට උපදෙස් දී ඇත.
දෙස් විදෙස් සංචාරකයන්ගේ දැඩි ආකර්ශණයට ලක්ව තිබෙන හෝර්ටන් තැන්න සහ ඒ ආශ්රිත ප්රදේශය ඉහළ පෙළේ සංචාරකයන් ඉලක්ක කර ගනිමින් සංවර්ධනය කිරීම මගින් රටට ඉහළ විදේශ විනිමයක් උපයා ගත හැකි බව ජනාධිපතිවරයා මෙහි දී පෙන්වා දුන්නේය.
එම සියලු කටයුතු පරිසර හිතකාමී සහ තිරසර ලෙස ක්රියාත්මක වීමේ අවශ්යතාව ද ජනාධිපතිවරයා පැහැදිලි කර ඇත.
වනෝද්යානය ආශ්රිත ගම්මානවල ජීවත් වන ජනතාවගේ ජීවන තත්ත්වය පිළිබඳවද ජනාධිපතිවරයා මෙහි දී විමසා බැලූ අතර, සංචාරක කර්මාන්තය ප්රවර්ධනය තුළින් එම ජනතාවගේ ජීවිත නඟා සිටුවීමට ද හැකියාව ලැබෙන බව සඳහන් කළේය.
අනතුරුව උඩවේරිය වතු යාය හරහා වැටී තිබෙන මාර්ගය හා ඒ ආශ්රිත ප්රදේශය ද ජනාධිපති රනිල් වික්රමසිංහ මහතාගේ නිරීක්ෂණයට ලක් විය.