අධිකරණයට අපහාස කළේ යැයි චෝදනා ලබා සිටින රාජ්ය අමාත්ය සනත් නිශාන්ත මහතා එරෙහිව ඉදිරිපත් කර තිබෙන පෙත්සම් තුනක් ජනවාරි මස 31 වනදා විභාගයට ගැනීමට අභියාචනාධිකරණය අද (13) නියෝග කළේය.
මෙම පෙත්සම් අද සෝභිත රාජකරුණා, අසා ධම්මික ගනේපොල යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල ඉදිරියෙහි කැඳවනු ලැබීය.
එහිදී නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජෙනරාල් ලක්මිණි ගිරිහාගම මෙනවිය සහ පෙත්සම්කාර මෙන්ම වගඋත්තරකාර සරත් නිශාන්ත මහතා වෙනුවෙන් පෙනී සිටින නීතිඥවරු ද ඉදිරිපත් කළ කරුණු සලකා බැලූ විනිසුරු මඩුල්ල අදාළ පෙත්සම ජනවාරි මස 31 වනදා විභාගයට ගැනීමට දින නියම කළහ.
මෙම පෙත්සම අද කැඳවූ ලැබූ අවස්ථාවේදී වගඋත්තරකාර සනත් නිශාන්ත මහතා අධිකරණය හමුවේ පෙනී සිටි අතර, නීතිපතිවරයා වෙනුවෙන් පෙනී සිටි නියෝජ්ය සොලිසිටර් ජෙනරාල්වරිය කළ ඉල්ලීමක් පිළිගත් අධිකරණය වගඋත්තරකාර සනත් නිශාන්ත මහතා වෙත යළිත් සිතාසි නිකුත් කරන ලෙස නියෝග කළේය.
ඉකුත් වසරේ අගෝස්තු මස 25 වනදා ශ්රී ලංකා පොදුජන පෙරමුණේ ප්රධාන කාර්යාලයේ පැවති මාධ්ය හමුවකදී අරගලයකට සමයේ අරගලකරුවන්ට ඇප ලබාදීමේ දී මහෙස්ත්රාත්වරු අනුගමනය කළ ක්රියාපටිපාටිය විවේචනය කිරීම තුළින් රාජ්ය අමාත්ය සනත් නිශාන්ත මහතා අධිකරණයට අපහාසයක් සිදුකර ඇතැයි චෝදනා කරමින් මෙම පෙත්සම් 3 ඉදිරිපත් කර තිබේ.
ශ්රී ලංකා අධිකරණ නිලධාරීන්ගේ සංගමය, ප්රියලාල් සිරිසේන සහ විජිත කුමාර යන නීතිඥවරු දෙදෙනා විසින් එම පෙත්සම් ඉදිරිපත් කර තිබේ.